Shillong: U Chief Executive Member (CEM) ka KHADC, u HS Shylla da thær u ya kiwa pynlai ka district kiwa da booh kyndon wow khang wow klam chaphang ka Them Iewmawlong ha ka Dorbar ka Hima Mylliem.
U Shylla da ong u wa ki bor district ym sñiawthooh ki yei thmu ka Dorbar Hima hadooh wow pyrkhat wa ki dorbar daw wanrah ki yei kulmar.
Hawa pynche chooh chooh ya ini i klam cha kiwa pathai khubor hadien wa kut ka dorbar Hima Mylliem, u CEM da pyntip u wa ki bor district da khang ki wow klam iwon iwon leh chaphang ka Them Iewmawlong kawa man leh hapoh i pait i yoo ka Hima Mylliem.
Hawa jubab lada ki kyndon yong ki bor district ki khlan ki bar ya ki aiñ ka KHADC, neiliang u Shylla da ong u, “U DC ye u wow leh kiyi kiyi heiyatoh waka aiñ wow pait ya ka suk ka saiñ, tangwa ki aiñ wa da mynjur da ka KHADC ki khlan ki ha ki yong ki hi ki rukom.”
Ha iwi tawon i liang ha i klam yong oo ha ka dorbar, u CEM da ong u leh wa toh u knieh biang ya ka ïewduh na ki baar jylla neibhah ka ïewduh man ko ka pliang ja yong u kup chiliang sem chiliang neibhah katni da chah knieh ha kiwi tawon ki jaitbru khamtam ha kani ka juk wa ki khynroo khyllood maad ki ya i dooh kreh.
“Da ong u wa man i iwa sñiawsih wow yoo wa ki bru yong i haap chong dukan ha ki luti syngkieñ, katwa ki baar jylla ki chong ki ha ki dukan heh,” ong u CEM.
Da kyntu u ya ka Hima Mylliem wow wanrah biang ya ka ïewduh kamwa da booh bynta, u Shylla da ong u, “Ka Hima da toh wow sdang noh ko wow thooh laad wa ka ïewduh wow man ko chispah na ka chispah ka yaaw yong ki tre ri.”
U CEM da ong u leh wa ka ïewduh ym man ko ka thaw sah yong kiwon kiwon neibhah da pynkylla chnong ya ka yaaw iwa da pynmih chiboon ki sih wa ki wym chngaiñ ha ïewduh.
Discussion about this post