Amlarem: Ha Amlarem ynne ka sngi da lehwarom ya ka sngi World Literacy Day 2018 hajrong ka phang “Swachhta Pakhwada” da ka yalang wa pynman da ka District Mission Coordinator SSA-SEMAM, West Jaiñtia Hills District hei ya krehlang waka State Project Director, SEMAM (SSA) Meghalaya Shillong ha Syiem Jingsuk Secondary School Auditorium Hall.
Ha kani ka sngi u kongsan uwa man leh u montri ka tnat puræ puthi, u Lahkmen Rymbui da ong u wa i puræ puthi wa i lehkhooid toh ki artylli ki kaam wa emkaam dooh wow pynku kyrdan yei rukom im ki bru.
Da ban joor u leh yeiwa emkaam wa ki manbei manpa wow pynpsiah ki hapoh i pyrkhat pyrdaiñ wa bha nadooh wa dang khian ki khon wow embynta bha ki ha ka kaam puræ puthi ki khon yong ki.
“Ym du hapoh ki skur wa ki khynnah yoh sikai ki tangwa da sdang nyngkong na yung heiwa ki bei ki pa man ki kam kiwa sikai wa nyngkong ki khynnah.” da ong u.
U montri da kyntu u leh ya waroh kiwa em haka kaam puræ puthi wow kreh chitom ki yow ye biang u wanrah ya ki khynnah skur wa da pep skur wow uiñ biang ki cha skur.
Da kyntu u leh ya waroh wow emkti lang ki yow pynman ya ka chnong ka thaw kawa khooid.
U Director of School Education and Literacy and State Project Director, SEMAM (SSA) u Ambrose Ch. Marak da ban joor u yeiwa emkaam pynyoh ya ka puræ puthi ya ki khynnah kynthai kamjooh ya kiwa da heh, “Ki kynthai em ki i bynta wa emkaam bha ha ka puræ puthi neibhah lada ka bei man ko kawa da stat da tip waroh kawi ka manyung leh daw bood ki ya ini.” da ong chooh chooh u.
Da yaroh u leh ya ka SSA Unit West Jaiñtia Hills yei kreh chitom wow pynkrehkaam ya kiwa boon ki bynta ka Sarva Shiksha Abhiyan.
Neiliang ka District Mission Coordinator SSA West Jaiñtia Hills ka Dr. L.M. Darnei da e ko ya ka bui (Report) hajrong ka Swachhta Pakhwada wa kiwi kiwi de ki jait kaam wa da leh da ki skur wa boon hapoh ka District.
Da pyntip ko leh wa da ya krehleng waka North East Transmission Company hapoh ka Corporate Social Responsibility Scheme kawa yarap da ki tiar ki tar kiwa yarap ya ki khynnah ha i puræ puthi.
Kiwi de wa em ha kani ka sngi toh u Garod LSN Dykes, Deputy Commissioner ka WJH kamjooh u Chairman SSA SEMAM West Jaiñtia Hills District wa ka D.M. Suja Addl. Deputy Commissioner In-charge Amlarem Civil Sub-Division.
Ha kani ka sngi da pynman leh ya ka yakop Debate wei da saam leh ya ki khusnaam cha kiwa jop ha ki yakop wa da dep pynman chwa.
Discussion about this post