Jowai: Chirup wa ka pyrthai waroh kawi, ka Jaiñtia Eastern College, Khliehriat ryngkat i yakrehlang wa ka Meghalaya AIDS Control Society (MACS), Shillong wa ka Rasthriya Uchchatar Shiksha Abhiyan (RUSA), Meghalaya; ynne ka sngi da lehwarom ko ya ka sngi ki khynroo khyllood namo ka ’21st International Youth Day’ hajrong ka phang “Safe Spaces for Youth” ha ka Hall kani ka thaw puræ.
Ha kani ka lehwarom da emlang u Bantei Kharshandi, Extra Assistant Commissioner yong ka East Jaiñtia Hills, Khliehriat kam u kongsan wei da em leh u Principal ka College u Dr. Phervision Nongtdu, kiwa sikai wa ki khynnah puræ kani ka thaw wei ya ka yalang da pynlai da u Dr. D. Diengdoh, P.O. NSS Unit yong ka College.
Ha kani ka lehwarom da pynman ya ka pynche wa ka yasyllok hajrong ki ar tylli ki phang kawi toh hajrong u khiang wa u kjut HIV/AIDS wei kammon wow yaleh ya kiwa boon ki exam lyngba ki kor Computer (Awareness on various Online Examinations). Ya kini ki phang da batai pynche da u Dr. J. Nongtdu hajrong ka phang Together Against HIV/AIDS wa u Prof. B. Papang uwa da batai ya ka Online Exam.
U Bantei Kharshandi kam u kongsan da ong u wa u khniang wa i kjut HIV/AIDS waroh tip i wa kani ka kjut man ko kawa chyrkhei wei kawa eh wow sumaar deiwa kyntu ya ki khynnah wa ymhoi u kheiñstiñ ki ya i chongkha chongman wei man i leh iwa kyntang.
U Dr. J. Nongtdu, Medical and Health Officer, OST Centre, NACO, CHC, Khliehriat lyngba ka Power Point Presentation da batai bniah u chaphang u khniang HIV wei kammon poor u wei kammon wow yada wei wow kiar ya uni u khniang.
U B. Papang, uwa man kam u Asst. Professor ka College, da batai u hajrong wa kammon wow yaleh yaki Online Exam lyngba ki kor Computer wa ka Internet.
Ka bynta wa ar yong kani ka sngi da leh burom ya ki khon khynroo khyllood ka East Jaiñtia Hills District kiwa da wan chakhmat ha i puræ puthi, ka put ka tem, ki yalehke Sports wa kiwi kiwi.
Da pynkup burom ya u Dr. Sankey Shangpung wa pyndep ya ka kyrdan Ph.D ha ka Chemistry, ka Sookini Sutnga ha ka yakob miat kynthai, u Redeem Tlang wa u Alwinson Bareh kiwa yalehke football, ka dhab tem “Dew Drops”, ka Dakahi Kyndait ha ki kaam Sports wa kiwi kiwi wei yeini da wan sakhi da u S. Marwein, MCS, Extra Assistant Commissioner jong ka East Jaiñtia Hills District, Khliehriat kam u kongsan.
Hawa e i klam u S. Marweiñ da yaroh u ya kani ka thaw puræ wa chimkhia ki wow pynkup burom ya kini ki khynroo khyllood deiwa kyntu ya ki khynnah wow chim kabu ki neibhah wa kani ka thaw wailaad ko ya ki ha kiwa boon ki bynta.
Da pynphooh ya kani ka sngi da ki chaad, i pynyoo riam, wa kiwi kiwi. Khaddooh ya ka lehwarom da pynkut da ki kyntien e khublei na ka DP. Bareh, Assistant Professor Economics Department, kani ka College.
Discussion about this post