Shillong: U montri rangbah ka jylla u Conrad K Sangma da ong u wa i khang ka sorkar ya ka Internet ha u Naiynru yong uni u snem toh neidaw waka sorkar kwah ko wow yada ya ki paidbah na ka yakhih ha ka thaaiñ Motphran.
“Kawa emkaam ha itu i por toh wow yada ya ki paidbah wei wow wanrah ya ka chongsuk chong saiñ, ym em wa poipyrkhat wow jia kam katu ka yakhih wei wow neh ko wei haap i wow leh yeiwa emkaam tam wow lait i poor ki khubor thok na ki bor ka Internet kam ka Facebook wa WhatsApp,” ong u Conrad.
Da ong u wa kam ha kitu ki por ka sorkar emkaam ko wow pyntikna wa kiwa chong chnong u yoh ki yei yada yow lait iwon iwon i jia wa sñiawsih.
U Conrad da ong u ya ini hawa jubab ya ki phang kylli kiwa wanrah da ka MLA ka East Shillong, ka Ampareen Lyngdoh ynne ka sngi ha ka dorbar.
Hawa jubab chooh chooh ya i kylli wa pynrap, u Conrad da ong u wa ka sorkar ye ko u chim da kiwi ki luti wow khang ya ki Social Media tangwa iyi wa bha dooh wa ka sorkar ye ko u leh ha kitu ki por da leh ko.
U montri rangbah da ong u wa i khang ya ka Internet da man ko ha ka 4 tarik neibynta 48 kynta, ha ka 6 tarik 24 kynta, ha ka 7 tarik waroh 24 kynta, ha ka 8 tarik 72 kynta wei da pteiñ biang ha ka 11 wa 12 tarik da 24 kynta.
“Hanlada ktah ko ya ka yoh ka kot na ini i jia, tangwa ym yohsa wow phah khang noh ya ka Internet, da em kiwi ki laad wow khang du ya ki Social Media kam ka Facebook wa ka WhatsApp, tangwa chimpor ki wa haap wow pyndep wa boon ki kyndon wei iyi wa ka sorkar sñiaw ko iwa emkaam da leh ko neibynta wow yada ya kiwa chong chnong.” da ong u montri rangbah.
“Nga da mynjur O wow khang ya ka Internet wa da ktah ko ya kiwa boon ya ka yoh ka kot khamtam ha ka kaam uiñke suwari wei ka sorkar da chim smat ko ya ka rai wow yada ya ki paidbah,” da ong u.
U Conrad da ong u wa i khang ya ka Internet ha katu ka por toh ha waroh kawi ka jylla wei yeini toh du ya ka Internet ha ki mobile phone donhi.
Discussion about this post