Shillong: Ka President ka tnat manbei ka Peoples Democratic Front (PDF), ka Grace Mary Kharpuri, da ong ko wa emkaam jhan wow pynbait ya i eh i khoo wei lada ymye toh u khylliap lama noh yong ka Party PDF hadien wa ki san ngut ki MDC ka Party da e ki ya ka chithi wow kyrchaan ya ka Executive Committee hapoh ka lama ka Khasi Hills Democratic Alliance (KHDA) wa yahkhmat da u HS Shylla kam u Chief Executive Member (CEM) wei yeini da leh khlem pyntip ya ka Party.
Kini ki MDC kynthup ki ya u heh ka Parliamentary Party (PP) ka PDF wa kynthup ya u James Ban Basaiawmoit, u Banteidor Lyngdoh, u Hadrian Lyngdoh, u Morningstar Mawsor wa u Arbinus Lyngdoh.
Hawa pynsñiaw yeini ynne ka sngi ha khmat kiwa pathai khubor, ka Grace da ong ko wa ka Disciplinary Committee ka Party toh u pynchitom ko ya kini ki san ngut ki MDC kiwa lai lait ya ka Party, kiwa da chim rai wow kyrchaan ya ka Khasi Hills Democratic Alliance (KHDA) ha KHADC khlem ka tip ka Party.
Da ong ko wa ym em pyrchah ko ya u Shylla næ ya ka EC ha KHADC, tangwa kini ki san ngut ki MDC da booh ki ya ka Party charood kamjooh ya ka wa ya u Chairman ka PDF, u PN Syiem, wei emkaam wow pynchitom ya ki kamwa da leh ya u Latiplang Kharkongor, u James Sylliang wa u Blanding Warjri.
Kam wow pynkynmoo heini kini ki le ngut ki MDC ka PDF, da kyrchaan ki ya ka KHDA ha Council wei hadien da chah beh ki chipor ha ka Disciplinary Committee ka Party wa da khlieh da u MLA ka Sohra, u Gavin Miguel Mylliem kam u Chairman.
Da ong ko wa ye u em iwon iwon ha lyndet namo i yoh myntoi samen wow lai kyrchaan ya ka EC khlem tip ka Party,
“Ki da chim kabu ki neibhah wa ka Party ym em ryntih ko, wei ym em i ya sñiawthooh yumut iwa pynman ya ki wow chim kabu ki,” da ong ka Grace.
Da pyntip ko leh wa em i wym sñiawsuk iwa da jia wei yeini da pynsñiaw ha ka yalang ka Party wa da pynman ha ka 28 Naikhynde wei da ekti ha ka Committee, khnang wa waroh soo ngut ki MLA ka PDF u ye ki wow ekti wow pait wei wow pyndam yei eh i khoo ha ka Party wei ya ka bui ympu yoh na ka Committee wei ka party emkaam ko wow chimkhia yeini wei lada ym pynchitom ya kini ki MDC katkam ki kyndon, u President wa u Secretary ka PDF toh u hiar chuki ki neibynta i bha wei lym kamtæ da toh wow khylliap lama noh ya ka Party.
Katkam wa ong ka MDC na Nongshken, i klumar ha ka Party man i iwa chyrkhei wei emkaam wow pait wei wow pynbait yeiwa eh wei kamwa yoo ko ka Party ym em de yatylli ko.
“Wot kiwa kyrchaaan ka Party ha Pynursla wa Nongshken Constituency ym sñiawsuk ki ya ka Party wei daw ap ya ka rai yong ki, kiwa da sñiawkhia yei eh i khoo wa i man i long ka Party,” da ong ko.
“Ka Election MDC da jan ko wei da toh i por wow pynkhlaan ya ka wei da toh u yaklam hajrong ki kyrtong wow yakhun ha ka Election MDC da i thmu na katwon tylli ki Constituency ka PDF u yoh ko ha KHADC, tangwa yoo lakam wa ka Party ym yoo pyrwa ko,” da ong ka Grace.
Hawa jubab yei kylli wow pyndam yei eh ka Party da uwi u MDC uwa man leh u MLA wa u montri ka sorkar, u Banteidor Lyngdoh uwa da kyrchaan ya ka EC u HS Shylla, ka Grace da ong ki wa ini pynyoo i wa u MLA ym lai u katkam ka luti krehkaam ka Party neibhah dadep phah wow pait yei eh i khoo ka Party katwa da tyngkheiñ pathan u ya ki kyndon ka Party.
Da pyntip ko wa rap nachwa u MDC ka Mawkhar-Pynthorumkhrah Constituency, u James Ban Basaiawmoit da maham u wow mih noh na ka Party lada ymyoh u ya ka chuki kam uwa yahkhmat ka liang pyrchah ha KHADC.
Heiyatoh wa ka Election wow jied CEM ha ka 13 tarik u Naiynñiaw ha Meghalaya High Court, da ong ko wa haap pyndam noh neibhah wa em ko samen wei u James Ban Basaiawmoit uwa ujor nyngkong da randien u wei ka leh ym kwah ko wow boonkaam neibhah wa da jan ka Election MDC.
“Ka EC hapoh i yahkhmat u HS Shylla ha KHADC da lai ko dang le bnai wei chim ko ki phang wow yada ya ka jaitbru, ym kwah O wow pynthut yei lai bait ka EC,” da ong ko
Discussion about this post