Jowai: Ha kani ka sngi Khyllaw 20 tarik uni u bnai hapyrdi i wan sakhilang u Riboon Challam, Additional Chief Engineer, PHE ka sorkar Meghalaya kam u kongsan, u Chwaki Najiar, District Agriculture Officer, Nongpoh kam u symbood kongsan wa ki waheh wasian manbei manpa, chim ka Women’s Welfare Organisation (WWO) yong ka Seiñraij Jowai wow e burom kyrpang ya ki 21 ngut ki khon khynroo khyllood kiwa yoh 75 Percent chaneiñ ha ka SSLC wa ka HSSLC Examination 2018.
Ya ka yalang kyrpang yong kani ka sngi da pynman ha Yungwalieh ka Loomkyrwiang heiwa ka Hima Lakiang, Chairperson ka Women’s Welfare Organisation kam ka chongknor dachim ko wow khana pynsñiaw yei krehkaam ka Seiñ neitæ won da pynbood i ngoohblai ngoohsyiem da ka Rilang Lato, Vice-Chairperson ka WWO katwa ya ki kyntien khublei ha ka bynta wa kut dayieñ wow e da ka Juliana Challam, Secretary ka WWO.
U O.R. Challam, President Seiñraij Jowai hawa e kyntien kyrpang neibynta ki khon khynroo khyllood da kyrsu kyntu joor u deiwa ong man kiwa em i chemphang wow pteiñ yei puræ puthi yong phi da ka luti wymtoh dei wa chah pynbor, deiwa dat tyrnang wei yabood lok hi-eh, pynchongñia chong nongrim yei stat wei chemphang yong phi deiwa ngam yillu khnang yow lait u yap sep-ai iwon iwon iwa chim phi u leh neitæ chooh chooh da ban joor u leh ya ki khon khynroo khyllood wow chim kabu ki u pynemkam ya ka juk stat yong kani ka por deiwa lai luti wamiat wabha ymtoh da ka luti wa bakla.
Neiliang u Riboon Challam kam u kongsan wa u Chwaki Najiar kam u symbood kongsan hei e kyntien ha kani ka prokram da yaroh ki yei krehkaam ka Women’s Welfare Organisation wei da e mynsiem ki leh ya ki khon khynroo khyllood wow yaleh chooh chooh ki u kreh chitom khnang yow ye ki u poi cha ka thong katkam wamut wamang wei thrang i angnood ka yung ka sem.
Ki khon khynroo khyllood kiwa da yoh yeini i naam i burom ha uni u snem toh kiwa kynthup ya ka Dalamwanhaka Passah, ka Ewanisa Toi, u Betwansao Passah, u Dathrangkio Pakyntein, u Armanki Nikhla, ka Makhane Najiar, ka Nimansha Bareh, u Daohi Laloo, u Dasain War, u Wanhi-i Challam, ka Rukani Laloo, ka Manhakani Passah, ka Emitre Lipon, u Dasmiar Suwer, ka Sukshisur Kyndiah, ka Wailangi Sumer, ka Kongka K.Passah, u Samkhain Lato wa u Pynchem Nikhla, yei naam Seiñraij Topper of the year 2018 da pynkup ha ka khyllood Arilam Kyndiah kawa da yoh 90.66% ha ka SSLC Examination 2018 wa ha u khynroo Lakhon Pakyntein uwa da yoh 93.75 % ha ka HSSLC Examination 2018.
Nalor kini kiyi kiyi da pynchoh pynchongchit chooh chooh ya kani ka sngi da i sur rwai wa da e na u Ebor Challam wa i Chaad Kylla Pliang na ki khon khyllood ka Seiñraij, Jowai.
(Photos By: Soolangki D. Laloo)
Discussion about this post