Jowai: U montri ka chnat puræ puthi ka jylla, u Lahkmen Rymbui ynne ka sngi da ong u wa kamwa 30% na ka mang poisa (Budget) ka sorkar jylla lai ko cha ka puræ puthi, wei yeini da ong u ha ka yalang pynkut ya i dap 25 snem ka St. Francis De Sales Secondary School, Bakur Dawki.
Da ong u wa na ka T. 2130 Klur emkaam sa kamwa T. 250 klur tam du wow pyndap yei emkaam wymhoi de u yait namo ki “Committed liabilities” wei neini i daw ya ka Education Policy wa pynmih ha u Naikhynde 2018, ka dhab ki montri (cabinet) da rai ko wow bichaar bniah iyi wa ye wow leh wow pynwandur (streamline) ya kiwa da em.
“Ym ye phi wow ngait wa hapoh jylla yong i em 142 tam ki skur wa em du kamwa 2 næ 3 ngut ki khynnah wei dang bichaar i katni kammon wow leh ya ki,” da ong u Lahkmen deiwa pynrap wa ka sorkar kwah ko wow e ya i stat wa paka (Quality Education).
Da ong u wa hawa wyrchaw wa kiwi ki jylla khian paaid kam ka Tripura, Nagaland, Manipur wa Arunachal em ki du kamwa san næ ynru hajar tylli ki skur, katwa ha Meghalaya won em ko 14,500 tam tylli ki skur.
Chooh chooh da ong u wa ha kini ki jylla em du kamwa ynru hajar ngut kiwa sikai SSA katwa heini won em palat 12,400 tam wei ka National Average ha kawi pa kawi ka skur em kamwa 120, 150 ngut ki khynnah tangwa hapoh jylla won em du 40, 50 ngut ki khynnah wei neitæ i daw i pynlut ka sorkar ha kani ka chnat man i iwa heh hadooh kattæ kattæ wei kam kiwa mihkhmat u chim wa kani ka bynta man ko kawa kongsan tam wow pyndooh yeiwa eh.
Discussion about this post