Shillong: Ka All India Congress Committee (AICC) ynne ka sngi da pynman ko ya ka yakhih ha waroh kawi ka ri India wow pyrchah yei pyndam kreh ya u Director ka chnat takit yong ka Central Bureau of Investigation (CBI), u Alok Verma heiyatoh wa i takit wow thied ya ki lieñsuiñ yasiat kiwa tip kam ki ‘Rafael’ da ka sorkar National Democratic Alliance (NDA) wa yahkhmat da ka Bharatiya Janata Party (BJP).
Ha jylla Meghalaya ya kani ka yakhih da pynman hakhmat ka yungkrehkaam u Superintendent ka CBI Shillong Branch da ka Meghalaya Pradesh Congress Committee (MPCC), wei da kbai ki leh ya ki kyntien wow beiñ deiwa rah ya ki kot rben kiwa thoh ya ki kyntien pyrchah ya ka sorkar NDA wa ya u Montri Rangbahdooh ka ri, u Narendra Modi.
Hawa klam ha kani ka yakhih uwa yahkhmat ka Congress Legislature Party (CLP) ha ka jylla, u Dr. Mukul Sangma da ong u waka party u pyrchah joor ko wei sñiawkhia ko ya ini i leh embor yong ka sorkar BJP iwa wanrah ya i maa ya ha i synchaar paidbah.
“I kwah i wa ki paidbah wa chong chnong wow tip ki ya ki kaam wa ka sorkar NDA da leh ko, wei toh u man i kiwa husiar wa kiwa syndong bha neibhah i yahkhmat ka BJP daw wanrah ko yei eh ha ka synchaar paidbah ha ka ri waroh kawi,” da ong u Mukul.
U Dr. Mukul da ong u leh wa ki pulit wa ki chnat takit kaam pyrchah aiñ kam ka CBI toh u man ki neibynta wow pynyoh ya i bichaar hok, tangwa neidaw ki kaam buit-tooh yong ka sorkar BJP da khang ya kani ka chnat wow leh ko yei kaam yong ka yow lait u mih pyrthai i hok.
“Kani da man ko ka sien wa nynkong nadooh wa i yoh laitlooid i wa ka sorkar wow kyrriah ko ya u sahep wa toh u khlieh ya ka takit, wei ki paidbah emkaam ki wow bichaar bha ya ini lada kwah ki wa ka synchaar paidbah u neh ko ha ri,” da ong u Mukul.
Da ong u leh wa ki paidbah leh da yoo ki wa boonsien waka sorkar NDA da leh ko boon ki kaam wow tlep yei pap yong ka iwa man iwa maa bha iwa leh ko.
Da kdaw u leh waka sorkar NDA da pynwiar ko leh ya ki chnat wa emkaam hapoh ka ri kam ka Planning Commission kawa man ka chnat wa emkaam wow pait yei lutsep yong ka sorkar lyngba ki chnat sorkar waphær waphær, hadooh wa katni ki kaam pynroi wa poi naka sorkar India wa wan cha ka jylla da sangeh lut ki.
“Suki suki daw yoo i wa ki paidbah daw mylliñ ki ya ka aiñ neibhah ki paidbah toh kiwa tieñ ya ka aiñ ym du ya u bru samen wei lada wiar i tieñ ya ka aiñ da man ko kawa maa ya ka riti synchaar paidbah,” da ong u Dr. Mukul.
Ki dkhot ka seiñ Congress kiwa em kamwa 50 ngut da lai kjat ki na pchem ka yung krehkaam ka CBI deilang wa i kbai ya ki kyntien pyrchah ya ka sorkar NDA hadooh i yung sah u Dr. Mukul Sangma ha Sherwood Bungalow.
Discussion about this post