Hadooh 10 tylli ki Wicket wa haap ynne hapyrdi ka Meghalaya waka Arunachal

Shillong: Kiwa kawang bol dang pteiñ hi ki wow pynyoo yei bor yong ki ha ka sngi wa ar ka yalehke Ranji Trophy hapyrdi ka Meghalaya waka Arunachal Pradesh kawa pynamn ha Shillong ynne ka sngi wei da sakhi yei haap ki 10 tylli ki Wicket waroh chwa wow pyndaam ya ka yalehke wa hiar u slap hei janmiet.

Ka Meghalaya da pteiñ ko neiwa ieh ko ynnin heiwa da yoh ko 87/6, iwa 79 Run chah pyntam ko ha ka kamai nyngkong ka Arunachal kawa da yoh 166 Run tangwa ka Meghalaya da haap lut ki Wicket ko deiwa yoh 141 run na ki 40 Over. Hadooh wa pynkut ya ka yalehke wa hiar u slap, ka Arunachal da yoh ko 104/6.

U Captain ka Meghalaya u Jason Lamare, da pteiñ u neiwa ieh u ynnin ka sngi heiwa da kamai u 42 Run wei da kamai u sa 28 Run chwa wow haap ka Wicket u ha uwa kawang bol u S Thakur. U Lamare da man u uwa da kamai boon Run dooh ha kani ka yalehke hadooh ynne ka sngi wei da yoh yarap u na u Aditya Singhania, uwa kamai 32 chwa wow haap ka Wicket u da ka LBW wei kini ki arngut deilang da kamai ki 47 Run ya ka Wicket wa 7 wa yeiñlang ki.

U Licha Tehi ym em de yoh u pynhaap Wicket na ki le tylli kiwa pynhaap u ynnin wei hawa kut ka yalehke ynne da yoh u 3/31, katwa u Subhash da yoh 3/47 wa u Thakur 3/19.

Related posts

District Cricket League: Jop ka Mupliang ya ka NEAU

May 9, 2025

U-20 Men’s National Football C’ship: Psiah Semi ka Meghalaya

May 9, 2025

Ka Arunachal hawa sdang ko ya ka kamai run wa ar yong ka deiwa tam chwa ko 25 Runs ym em sdang ko deiwa miat heiwa ha ka bol wa nyngkong da haap u Wicket wa nyngkong yong ka u
Doria hadien ini da haap sa ar tylli ki Wicket wei ka Arunachal da yoh 14/3 wei hadien won da wan u Kshitiz Sharma uwa da kamai 41 Run wa u Obi uwa da kamai 12 Run kiwa deilang da kamai ki 51 Run tangwa u Sharma da haap ka Wicket u ha uwa kawang bol ka Meghalaya u Negi uwa ha kani ka sngi da yoh u 3/29, u Gurinder Singh 1/14 wa u Raj Biswa 1/22.

Hadooh wa kut ka yalehke ynne ka sngi u Captain ka Arunachal uwa man leh kam u Wicket Keeper u Kamsha Yangfo da kamai u 22 Run khlem haap ka Wicket u wei da emlang wa oo u Mohammed Shoyeb uwa ym pu em kamai chi Run wei da kut chooh ka yaleh ynne ka sngi 104/6 iwa pyntam da 129 Run ya ka Meghalaya chwa wow lai cha ka sngi wa le.