theme-sticky-logo-alt
theme-logo-alt

Trywa u Lambor Malngiang wow pynyieñ da u kyrtong wa laitlooid ha ka MP yow lait i sniawthooh bakla hapoh ka MDA

Advertisement ad1

Shillong: U MLA wa samen ka Nongkrem, u Lambor Malngiang, uwa kyrchaan ya ka sorkar Meghalaya Democratic Alliance (MDA), da ong u wa emkaam wow tyrwa kyrtong emkaam wow pynkrehkaam ya ka jooh ka buit (Formula) kawa da leh ha u snem 2004 wow yoh ya u kyrtong MP 2019 cha ka Lok Sabha.

U Lambor uwa man leh u Chairman ka Meghalaya State Planning Board (MSPB), da ong u wa ha ka Election Lok Sabha 2004, ki Party ri-loom da kyrchaan ki ya u S. Loniak Marbaniang kam u kyrtong ka Regional People’s Alliance (RPA) na Shillong Parliamentary Constituency tangwa da chah pynrem u ha u kyrtong ka Congress u tynde u Paty Ripple Kyndiah uwa da yoh 190058 Vote katwa u kyrtong ka RPA won da yoh wa-ar u deiwa yoh du 119162 vote.

Advertisement ad1

“U kyrtong hunlang toh u man u uwa ye u pdiang da waroh wei toh u yakhun u na ka chaap wa laitlooid (Independent). U Marbaniang heitu i por da yakhun u kam u kyrtong samen wei da kyrchaan ya oo da ka RPA,” da ong u Lambor.

Ka Shillong Parliamentary Seat katni da mihkhmat la ar samoi da u Vincent H Pala na ka Congress.

U MLA ka Nongkrem da ong u wa i krehlang wow bood ya i buit wa nachwa daw pyntikna ko wow pynrem ya ka Congress hadooh wot wow pyndam yei yaphær i sñiaw hapyrdi ki Party hapoh ka MDA.

Haini wa da dep ka United Democratic Party (UDP), kawa pdiang wow yoh ya u kyrtong monlang da pynbna ko ya u MLA warim ka Nongthymmai u Jemino Mawthoh kam u kyrtong yong ka na Shillong.

Katwa dang pynkhreh wow pdiang ya u Jameno kam u kyrtong hunlang ka MDA, ka UDP kawa man ka lok wa kor ka MDA da kyntu ko ya ka National People’s Party (NPP) wow booh kyrtong ko du na Tura donhi.

I kaam wow yoh kyrtong hunlang lyngba ka MDA Coordination Committee, kiwa boon hi ki party da paan por ki wow chim chwa jar ka rai chwa wow tyrwa yei rai ha ka Committee.

Neiliang ka People’s Democratic Front (PDF) da ong ko wa daw chim ko ya ka rai ha ka 5 tarik uni u bnai chwa wow tyrwa cha ka Committee.

Kamjooh leh ka Bharatiya Janata Party (BJP) da pynsñiaw ko wa kwah ko wow pynyakhun da u kyrtong yong ka hi ha kani ka Election MP wow wan.

Neiliang won u Lambor da ong u wa ka Co-ordination Committee daw yachem biang ko neini heiwa waroh ki party ye ki wow tyrwa ya u kyrtong yong ki hi dei thmu wow rai kyrtong chwa wow kut uni u bnai.

Da pynrap u deiwa ong wa i rai ka UDP toh iwa daw rah hakhmat ka Committee deiwa kam leh wa ka Election Lok Sabha ym ktah i yei skem ka sorkar MDA hapoh jylla.

Ka sorkar MDA toh ka sorkar wa em ynru tylli ki Party wa kynthup ya ka National People’s Party (NPP), United Democratic Party (UDP), Hill State People’s Democratic Party (HSPDP), Bharatiya Janata Party (BJP), Nationalist Congress Party (NCP) wa ka PDF.

Share this:
Previous

Hadooh 10 tylli ki Wicket wa haap ynne hapyrdi ka Meghalaya waka Arunachal

Next

Na ka chithi wa thoh uwi na Jowai pynkylla PIL ka High Court wow yarap ya ki khynnah wa thiah miet cha sarok