U Kyrtong MP monlang ka MDA toh u man u na ki seiñ ri-loom: RDA

Shilong: Ka yalang yong ki seiñ ri-loom, ka Regional Democratic Alliance (RDA) kiwa man ki party wa emlang ha ka sorkar synrop Meghalaya Democratic Alliance (MDA) da pynsñiaw ki wa kwah ki wow dam u kynthup ya u kyrtong ka Bharatiya Janata Party (BJP) kam u kyrtong monlang ka MDA neibynta ka election MP, hanlada ka BJP em ko arngut ki MLA wa emlang ha ka sorkar.

“Neiliang yong i ka RDA kwah i wa ka BJP u yakhun ko næ wow pynyieñ ko yow kyrtong ha ka election MP, katwa kiwi won ki party wa emlang ha ka sorkar u krehlang ki neibynta u kyrtong monlang,” da ong u Renikton L Tongkhar, uwa yahkhmat ya ka HSPDP hawa yaklam wa kiwa pathai khubor hadien ka yalang.

U Renikton da ong u wa ka UDP wa ka HSPDP dadep pynbna ki ya u kyrtong wow tyrwa hakhmat ka Co-ordination Committee ka MDA, wei yooluti ki wa u man u kam u kyrtong monlang hanlada ympu ye u pyntikna wow em ka BJP kawa man kam ka National Party.

“Ka BJP toh ka party kawa yahkhmat da ki bru na ri-thor næ ka National Party, ye ko wow sñiaw wa ye ko jop ha ka election tangwa man won i iwa eh ya ka BJP wow dam ko u pynyakhun ha kani ka election,” da ong u Renikton, deiwa pynrap, “da booh chwa i wa laitlooid ka BJP, lada booh kyrtong ko leh biang hi wei lada ym booh ko leh biang wow kyrchaan ko ya i.”

Related posts

U pyndam ka Mizoram ya kiwa kreh sorkar ki wym ye wow leh yei kaam yong ki

November 28, 2024

Sdang ka sorkar da ka Community Public Private Partnership deiwa e yarap Rs. 106 klur

November 28, 2024

U Renikton da ban biang u wa ki seiñ ri-loom kwah ki wa ka BJP u yaleh bait ko ha ka election MP katwa ki seiñ ri-loom u booh ki da u kyrtong monlang.

“E wa ka BJP u yakhun ko, i leh lait na ka BJP kawa emlang ha ka sorkar MDA, kwah i du uwi donhi u kyrtong,” da ong u heh ka HSPDP.

Hajrong i maham ka UDP wa ye i wow ktah ya ka sorkar lada ym yoh ya u kyrtong monlang na Shillong da u dkhot ka party neiliang u Vice President, u Allantry Dkhar da ong u wa ka party yieñ ko ha ka jooh ka yurim neibhah krehlang ko ha ka sorkar wei emkaam wow yoh ko jaar i bhah.

“Ym em i maa ya i tangwa ya ka party wa yahkhmat ya ka sorkar, i yakrehlang i wei emkaam wow em ka bhah wei itæ man i iwa sakhiat, haap i leh wow klam laitlooid yeiwa sakhiat ym du wa ka UDP tangwa waroh ki seiñ wa em ha ka  sorkar MDA,” da ong u Allan.