Jowai: Ynnin ka Sngi Choh-that, palat spah ngut ki paidbah na kylleiñ ka thaaiñ Tuber Constituency da psiah ki cha ka Party NPP ha ka yalang wa pynman ha Khliehriat West Community Hall.
Ha kani ka yalang, u kyrtong wa thrang u yakhun biang ya ka MDC Election 2018, u Helping Phawa, uwa da jooh man kam u MDC warim na thaaiñ Tuber da psiah u cha ka Party NPP wei waroh kini ki paidbah toh kiwa kyrchaan yong oo.
Ya kani ka yalang, da pynlai da u Rapbait Bareh, President ka NPP Khliehriat Block ryngkat i emlang kiwa e buit wa kynthup ya u Joinriwel Pyrtuh MDC ka Bataw Lakadong wa u Phasmoon Dkhar MDC ka Musniang Rangad.
Neiliang ka Party NPP Khliehriat Block da yaroh ko ya u Helping Phawa uwa da ye wow wanrah kat kini ki bru wow psiah cha ka Party.
“I kyrmen i wow jop boon na East Jaiñtia Hills neibhah ha East Jaiñtia Hills em hadooh 9 ngut ki MDC wei kyrmen i wow jop ha waroh 9 seat”, da ong u Rapbait Bareh, President ka Party.
Hajrong ka Ticket neibynta u Helping, u Bareh da ong u wa neiliang ka NPP Khliehriat Block u pyrchang i wow tyrwa tangwa ka rai wa khaddooh toh ha ka e ya ka rai ka District Unit wa ka State Level.
Kam wow pynkynmoo, u Wailadmiki Shylla uwi na ki dkhot ka Election Committee hapoh i yahkhmat u Sniawbhalang Dkhar kam u Chairman, hawa yaklam wa kiwa pathai khubor da pynbna u wa waroh kiwa thmu wow paan ticket MDC na ka Party u kut i ha ka 30 tarik uni u bnai wei hadien wa yoh ya Application, daw bichaar bniah wei heitæ u e won ya ka rai, da ong u Wailadmiki.
Discussion about this post