Shillong: U Lat ka jylla, u Tathagata Roy ha ka 29 Khonchonglad da paan u dei thoh na ka sorkar jylla, lyngba ka District Council Affairs (DCA) hajrong ki soo tylli ki Bill wa da mynjur da ka Khasi Hills Autonomous District Council (KHADC) dang ini wadep, wei yeini da khana da u Chief Executive Member (CEM) ka Council, u HS Shylla hawa yaklam wa kiwa pathai khubor ynne ka sngi.
Kini ki soo tylli ki Bill kynthup ki ya ka Khasi Hills Autonomous District (as adapted from the Bengal Eastern Frontier Regulation, 1873) Regulation, 2018, ka Khasi Hills Autonomous District (Constitution of Subordinate Council of Traditional Chiefs and Headmen) Rules, 2018, ka United Khasi-Jaintia Hills District (Establishment of Town Committee) (Second Amendment) Rules, 2018, wa ka Khasi Hills Autonomous District (Khasi Social Custom of Lineage) (First Amendment) Bill, 2018.
U CEM da pyntip u wa yeini u Lat u da phah u lyngba u Deputy Secretary, u PS Kharkongor na Raj Bhawan cha u Commissioner & Secretary, District Council Affairs ka sorkar jylla deiwa sooh lang ya kini ki soo tylli ki Bill.
“Sñiawkmen i wa u Lat da chimkhia u ya ki Bill wa da mynjur da ka Council, kyrmen i wa ka sorkar jylla daw e noh ko dei thoh hajrong kini ki Bill khnang wa u Lat u e noh u ya ka muhor wow man aiñ noh ki,” da ong u Shylla deiwa pynrap leh wa sñiaw tikna u wa kini ki Bill u man aiñ noh ki dei chimkhia u Lat.
Ha iwi won i liang u Shylla da ong u wa hadien wa ka council dadep mynjur ko ya kini ki Bill, kattu sñiaw emkaam wow chna noh sa ya ka Synjuk ki Rangbah Kur ka Bri u Hynniewtrep (SRKBH).
U CEM da ong u wa kani ka synjuk u man ko kawa khlanbor bha wow yada ya ka jaitbru, neibhah hadooh katni ki seiñ Kur ympu chah ktah ki ha iwon iwon i liang, wei lyngba ini ka synjuk daw ye u pynkhlan yei man iwi yong ki Khasi-Jaiñtia.
Discussion about this post