Shillong: U montri rangbah ka jylla uwa man leh u khlieh ka NPP, u Conrad K. Sangma ynne da lai yalap u ha Abima kawa haap hapoh ka Selsella Constituency, West Garo Hills wow paan yei kyrchaan ha ka Bye-election, ka wow man poi snem.
U Dilliram G. Marak, uwa da yoh 3296 vote ha ka election MLA wa dadep na Selsella Constituency kam u kyrtong samen, da psiah u cha ka NPP hei emlang u Conrad K. Sangma wa kiwi kiwi kam u Working President, u Semford B. Sangma, CEM ka GHADC Dipul Marak, Chairman ka GHADC Denang T. Sangma wa u kyrtong ka NPP na Selsella Constituency u Ferlin C.A. Sangma wa kiwi kiwi.
Hawa pdiang burom ya u Dilliram Marak cha ka party, u Conrad da ong u wa u Dilliram em u ka thong wow kreh neibynta ki paidbah wei da sñiawskem u wa kattu daw khlan chooh ka Party ha ki Election wow wan.
Da pyntip u ya ki paidbah wa ka NPP kreh ko liang wanang wow wanrah ya ki kaam pynroi hapoh jylla wei da paan u yei kyrchaan na ki paidbah wow pynjop ya u Ferlin neibynta ka Bye-election wow wan.
Da ong u leh wa ka NPP da kreh ko khlem chong-ngiah ha kini ki phra bnai wa dadep wow wanrah ya ki kaam pynroi ha kylleiñ ka jylla.
“Em chiboon i eh i khoo wa chem i tangwa nei yahluti ki heh ka Party da ye i wow wanrah yeiwa kwah wei emkaam ki paidbah,” da ong u Conrad.
Heiyatoh wa ki kaam kam i chait i khiah, i kaam rep, i kaam uiñke suwari wa kiwi kiwi neiliang u Conrad da ong u wa kawi na ki thong wa emkaam toh ka wow e khih e kreh ya ki paidbah wei wow pynbiang leh ya i puræ puthi, ka khayi pateiñ, ki sarok wa kiwi kiwi.
Discussion about this post