Shillong: Ka sorkar jylla ym slem de daw khut yaklam ko ya ka seiñ kiwa dai dukan ha rood sarok wa ki luti lai kjat (Hawkers and Vendors) ka nangbah Shillong, wei ya kani ka rai da ka sorkar jylla da chim hadien ka yalang yong ka chnat pynroi kawa da man ynnin ka sngi.
Ha kani ka yalang da khlieh da u Montri Rangbah ka jylla, u Conrad K Sangma, ryngkat u montri wa pait yei pynroi sor, u Hamlet Dohling, ki heh pulit nadooh u DGP, u Principal Secretary ka cnat Urban, u DP Wahlang, u CEO ka Shillong Municipal Board wa kiwi kiwi.
Kani ka yalang da pynman ya ka ha Secretariat, hadien wa wan pait u Hamletson ya ka Police Bazar wa kiwi ki thaaiñ hajrong i jakhlia wa i khnnia ki sarok.
U Hamletson da pyntip u leh wa ka sorkar daw yachem ko wa ki seiñ kiwa dai dukan harood sarok wow chim ya ka rai neibynta i bha yong ki kamjooh leh i yong kiwi wei wow tip wa hadooh katwon wa im ja neini i chong dai.
“Kwah i wow yaklam hajrong i tia pood kiwa dai dukan harood sarok wa cha ki luti lai kjat wei wow thooh ki laad wow lait na ki. Sñiawkhia i leh yei chitom wa yachemki paidbah,” da ong u Hamlet.
Da pyntip u leh wa ka sorkar ymkwah ko wow leh jhan yeini neibhah wa dang em ka mukotduma wa ka yung bichaar wei hadien kini ki yalang daw ye u wanrah yei chitom ki paidbah hapoh ka yung bichaar.
U Hamlet da ong u wa ka sorkar tip ko wa ki paidbah em ki jiar i hok, tangwa wow tip yeitæ iwa eh yong kiwa dai madan harood sarok, ka sorkar kwah ko wow thooh ki laad wow dam u ktah ya kiwi.
Hajrong i jakhlia ka sor, u Hamlet da ong u wa ka sorkar da khang ko wow noh taroi cha sarok wa ki luti syngkieñ deiwa pynchitom ya kiwa leh pyrchah wei wow pynemkaam leh ya ki bor pulit kamjooh ki yong ka Shillong Municipal Board (SMB) hajrong ini.
Da kyntu u leh ya ki paidbah wow em ki i bahkhlieh samen hajrong kani ka kaam wow wanrah yei khooid i jngiar.
Discussion about this post