Ha ka 10 tarik u yaklam ka EC wow kyntait ya ka scheme wa wan na ka cnat Panchayat ka sorkar India

Shillong: U Executive Member ka Khasi Hills Autonomous District Council (KHADC) wa pait ya ki Elaka, u Latiplang Kharkongor da ong u wa ka KHADC daw pyrchah ko ya i thmu yong ka chnat Panchayat ka sorkar India wow wanrah ya ki scheme pynroi ha ki chnong wa haap ha ki Scheduled Area.

Hawa yaklam wa kiwa pathai khubor ynnin ka sngi u Kharkongor da ong u wa da yoh yutip u na ki kattu katni ngut ki Rangbah Shnong wa em ka scheme wa ye u bhah na ka Panchayat Ministry kiwa da thmu wow pynpoi bait cha ki Community & Rural Development Block (C&RD) kiwa em ha ka jylla neibynta ki kaam pynroi.

“Ym pyrchah ya ki scheme ka sorkar pyrdi neibynta ki kaam pynroi tangwa da pynkulmar ko ya kiwa pynlai chnong neidaw wa ki wan bait ki na ka Ministry of Panchayati Raj,” da ong u Kharkongor.

U EM da pyntip u wa yow yoh ya kini ki scheme, ki chnong ki thaw haap ki wow chna ya ki Gram Sabha Committee da i thmu, ‘My Village My Plan’, kawa ye u wanrah i maa ha ka rukom synchaar chnong, deiwa pynrap u deiwa ong pdiang, hawa kut ym tip u poi cheiwon ki rangbah shnong.

Related posts

Lada ka sorkar sñiaw ko wa emkaam palat ko wow wanrah luti rel ye ko wow lai chakhmat: Ardent

May 12, 2025

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

U Kharkongor da ong u wa ki paidbah katni kulmar ki hajrong kani ka scheme neidaw wa katkam wa thoh wa da poor lyngba ka WhatsApp, kawa ong wa kiwon kiwon kiwa da yoh u thap Vote ki ye ki wow embynta ha kitai ka Gram Sabha, wei ini daw wanrah yei maa dooh ha ki thaw wa chong khleh wa kiwi ki jaitbru neibhah daw dawa yow yoh u man dkhot.

Da ong u wa lada ya ka kaam Chairman ka Gram Sabha Committee u khlieh da ki rangbah shnong, kamtæ daw tip noh ya ki kam ki rangbah shnong namo ki Sarpanch, wei ya kani ka Committee haap wow Register kamwa leh ya ki Society, deiwa bynrap wa ini i leh ka sorkar pyrdi toh wow pynkylla ya ki dorbar shnong cha ki Panchayati Raj.

U Kharkongor da ong u leh wa ya ka Meghalaya da pynlait ya ka na ka Panchayati Raj neidaw wa haap ko hapoh ka Sixth Schedule.

Hawa yaklam wa u Chief Executive Member (CEM) ka KHADC, u Hispreaching Son Shylla da ong u wa hadooh katni ka KHADC ym pu yoh yutip ki ya kani ka scheme tangwa da yoo donhi yei wa thoh hi-eh cha WhatsApp wa i yaklam kiwa pynlai chnong. Tangwa da ong u wa ka council daw bichaar ko ya ini wei dawa wanrah ya i yaklam ha ka Executive Committee ka wow chong ha ka 10 tarik uni u bnai wei lada emkaam daw khut leh ya ka dorbar kyrpang wow yaklam harong kani.