Jowai: Ki bor pulit ka East Jaiñtia Hills chirup wa ki NDRF, SDRF, Fire & Emergency Service ynne waroh chi sngi nadooh i step da kreh chitom ki wow pynlait ya ki 13 ngut kiwa chah kset ha i krem mooyong nadooh ynnin ka sngi ha Ksan, hajan ka wah Leteiñ, Saipung Police Station.
Hawa yaklam wa u SP ka District, u S. Nongtnger lyngba ka phone da pyntip u wa ynne ka sngi da leh chitom bha ki wow pynlait ya kini ki 13 ngut tangwa hadooh i janmiet ympu em u ye wow pynlait ya ki.
Da ong u wa i kreh wow pynlait ya kini ki 13 ngut da sdang i nadooh i step ynne ka sngi wei da sangeh won i hei janmiet heipor wa sdang kem rngu (kamwa 5:00 waje) deiwa pynrap wow sdang biang mynstep i step nadooh 5:30-6:00 waje.
Da pyntip u wa da wan rap boon ki bru wow yarap kam na ka chnat NDRF wa wan hadooh 72, SDRF – 12 ngut, Civil Defence – 11 ngut, Fire & Emergency Service, wa kiwi kiwi.
Hajrong i wym dap ki kor wow sai (pump) ya ka um na kani ka krem da pyntip u wa mynstep daw pyndait (install) chooh wei neiliang ki bor district yaleh ki katwa ye wow pynbiang ya ki.
Heiyatoh wei man i long yong ki 13 ngut neiliang u Nongtnger da ong u wa ympu ye u ong iwon iwon leh kat wympu chem ya ki.
Discussion about this post