Shillong: Ka Hill State People’s Democratic Party (HSPDP) da pynsñiaw ko wa ka jylla ka emkaam jhan ko ya ka Mining Policy khnang wow lait na i oor i pra ki paar mooyong kamjooh i tih mooyong wa pyrchah ya ka aiñ. Ya ini, kiwa yahkhmat ka HSPDP da yaklam ki hawa pynsñiaw yei sñiawkhia hajrong i tih mooyong pyrchah ya ka aiñ iwa da wanrah leh i chah kset um ki 13 ngut kiwa mylla ha kawi ka krem mooyong wa em ha East Jaiñtia Hills.
Hawa yaklam wa ki kattu katni kiwa pathai khubor, u President ka HSPDP, u K P Pangniang da pyntip u wa ka Party hanlada em ko ha ka sorkar Meghalaya Democratic Alliance (MDA), tangwa ha kini ki kajiak bnai da lai yachem ko wa u montri rangbah ka jylla, u Conrad K Sangma wow kyntu ya ka sorkar wow chna noh ko ya ka Mining Policy yow pynlait noh ya kiwa eh wow tih mooyong.
“I da yaklam i wa u montri rangbah, lada em ka laad wow chna noh ya ka aiñ wow yoh u tih ya u mooyong katkam ki kyndon wa da booh da ka National Green Tribunal (NGT),” da ong u Pangniang.
Da ong u wa ka Party da dep ko wow klam che ya ka hok ki tre ri hajrong ka khyndaw ka chyiap wa toh ki u yoh. “I kwah i wa ka sorkar u wanrah ko ya ki laad ki luti noh yow yoh tih ya u mooyong deiwa ym ktah ya ka rymaw kamjooh i dooh ya i mynien bru,” ong u President ka HSPDP.
Ha iwi tawon i liang u General Secretary ka HSPDP uwa man leh u MLA ka Mawkyrwat, u Renikton Lyngdoh Tongkhar da ong u wa ka Party ka sñiawkhia ko ya iwa jia wa chah kset ki 13 ngut na i chlai um ka krem mooyong ha East Jaiñtia Hills, deiwa pynrap wa ka Party ym pynchlur næ kyrchaan ko ya i tih mooyong pyrchah ka aiñ.
Da ong u wa i khang tih mooyong da ktah bha ko ya ki bru wa im sngi na ka kaam tih mooyong tangwa ki bru manda em ki ha ka kut laad ki leh ki ya kani ka kaam hanlada man ko pyrchah ya ka aiñ.
“Man da em i eh ha ka kamai jakpoh, boonsien ym yohsa i wa pynman wow leh ya iwa sang,” da ong u.
Discussion about this post