Jowai : I thrang wei angnood ki paidbah ki chnong wa em cha chilliang ka wah Myntang kam ka Psiar, Khatkasla, Moolber wa kiwi kiwi kiwa em ha Block 1 yow yoh noh ya ka yingkieñ Kureliya yoosar dang slem bha u yoh ki ka.
Hadien wada sdang biang i kreh ha kani ka yingkieñ kawa lai lyngba ka wah Myntang ya kawa da sdang u chna biang nadooh u Kmaichonglad (December) uni u snem wa da dep, da chah pynsangeh yei kreh ha ka 24 tarik u Thohlakhmi (February) uni u snem ha ki bor sorkar wa ki pulit ka Assam.
Katkam ka yutip wa da yoh na ki bru wa tikna da ong wa i chna ya kani ka yingkieñ dang sangeh hadooh katni neidaw wa dang sah ki kot ki sla wei yaklam hapyrdi ki heh yong ka jylla Meghalaya wa Assam.
Kam wow pynkynmoo leh heini wa ha uni u bnai ki bor pulit na West Jaiñtia Hills da chna ki leh ya ka camp ha kylla ka wah Myntang yow sonteri ya kiwa kreh ha kani ka yingkieñ na ki bru wa chim kabu.
“Ini wa man katni pynyoo wa tlot ka sorkar Meghalaya lada wyrchaw wa ka Assam neibhah lada ka Assam ye ko u chna ya ka yingkieñ ha ka wah Wyrjiang kawa haap hapoh Block 1 tæ yi eh ya ka Meghalaya ym ye ko u chna ha Tihwieh wa haap ha Meghalaya” da ong u ma Rikut Parien u President ka JSU uwa man leh kam Secretary ka Pangam Raliang Border Development Committee (PRBDC.)
Chooh chooh u ma Rikut da ong u wa katkam wa rai ya ka Status Quo da klam che wa pyn ar ki sorkar ye ki u wanrah yei kaam pynroi ha kini ki thaw tæ ileh won ka Assam leh embor ko deiwa pynsangeh yei kreh ha kani ka yingkieñ.
Discussion about this post