Jowai: Ka Amita Sangma kawa chah dat chirup waka Agnes Kharshiing ha ka 08-11-18 ha Chohchrieh, East Jaiñtia Hills heipor wa lai booddien ki ya i kaam khayi mooyong wa pyrchah ya ka hukum ka NGT da thoh ko cha u montri rangbahdooh ka ri u Narendra Modi yow tuklar u yei tih mooyong pyrchah ya ka aiñ ha Chohchrieh East Jaiñtia Hills.
Ha kani ka chithi da ong wa ha ka 08-11-18 nyngkong da lai ki cha ka Ladrymbai Out Post yow paan pulit sonteri yeiwa da kyntait ki u yarap neidaw wa duna pulit wa kreh wei da lai bait ki cha ki thaw wa em ki truck wa dang kit mooyong ha Kongong wei da chondur ki ya ini wei da wan u Nidamon Chulet (uwa dang pynhaap moo) wa yahkmat u ya 30-40 ngut ki bru uwa da wan yaklam wa ka Agnes Kharshiing yow dam ko u booddien ya ini kawa da kyntait wow yaklam wa oo wei da sdang u kynjat u dat ka wei hawa pyrchang ka Amita u yarap ka (Agnes) ka leh da chah dat ko wei da noh ya ki hapoh iwi i khloo yow yap ki.
Chooh chooh da ong wa ym em ye ki pulit u kem ya waroh kiwa emkti wei da ye u kem du 7-8 ngut donhi katwa u Nidamon Chulet uwa man leh kam u Working President ka NPP Jaiñtia Hills da wan pyndem u ha ka 25-12-18.
Ka Amita da ong ko wa ka sorkar Meghalaya suki hi-eh ko heiyatoh wa ini i kaam hanlada da dawa wow thung da ka CBI Inquiry tangwa da thung du da ka Independent Inquiry kawa ymye u chaniah neidaw wa boon ware kiwa emkti ha ka kaam tih mooyong.
Da ong ko leh wa iwa jia heiwa da chah kset kiwa tih mooyong toh u ye u yait ki lada bood hok yei hukum ka NGT wow khang ya i tih mooyong deiwa pynbaad ko wa ka sorkar, kiwa khih mooyong wa ki pulit waroh emkti lang ki kamtæ emkaam u pynman da ka takit yong ka CBI.
Discussion about this post