Shillong: Ka People’s Democratic Front (PDF) ynne ka sngi da pynskem ko da u Albinus Lammurong kam u kyrtong wow yakhun na ka Party ha ka Election MDC cha Jaiñtia Hills Autonomous District Council (JHADC) ka wow man ha ka 27 Thohlakhmi, 2019 na 26-Sumer MDC Constituency.
Ya ini da pynskem da chim ha ka yalang wa pynman ha madan ka chnong Kremmyrsiang, kawa man ka chnong wa da kha ya u Albinus Lammurong, kawa haap hapoh ka Elaka Sumer, East Jaiñtia Hills District.
U Albinus Lammurong da jooh man u leh kam General Secretary warim ka Khasi Students’ Union ( KSU) Jaiñtia Hills District Unit.
Ha kani ka sngi da pynskem leh ya kiwa kitkaam ka PDF Sumer Unit da u Shibor Lamare, President ka PDF East Jaiñtia Hills District hei emlang u Hamletson Dohling, MLA ka PDF na Mylliem Constituency, uwa man leh u montri sorkar jylla Meghalaya wa pait ya ka Urban Affairs, Information Technology; u Ivanlumlang Marbaniang, President ka PDF wa kiwi kiwi.
Kiwi kiwa emlang ha kani ka sngi toh kiwa kitkaam ka PDF East Jaiñtia Hills District, ka PDF Zonal Committee Sutnga-Saipung Constituency wa na ka Khliehriat Constituency, ki paidbah ka 26-Sumer Constituency wa kiwi kiwi.
U Albinus Lammurong hawa e i klam da ong u wa da ieh u yei kaam General Secretary ka KSU-JHDU toh wow em bynta noh ha kiwi tawon ki bynta wow chakri paidbah lyngba ka saiñ pyrthai.
Da ong u leh wa kawon kawon ka seiñ ym man ko kawa sih tangwa man i neidaw wym krehkaam kiwa kitkaam ki party wei yoo u wa du ka PDF wa kreh neibynta ki paidbah ka jylla, iwa kiwi ki party ymyoo ki.
Discussion about this post