Daw yaklam ka NPP chwa wow dam u krehlang wa ka sorkar NDA: Conrad Sangma

Jowai: Hadien wa mynjur ka Lok Sabha ya ka Citizenship Amendment Bill ynne ka sngi neiliang u Montri Rangbah ka jylla uwa man leh u President ka National People’s Party (NPP), u Conrad K Sangma da ong u wa daw khut ya ka yalang chwa wow chim ya ka rai lada ka NPP u dam noh ko u krehlang wa ka sorkar NDA ha Delhi.

Da ong u wa ka NPP em ko ha ki san tylli ki jylla ha North East wei haap yaklam lang ko wa kiwa kitkaam na waroh ki jylla chwa wow chim ya ka rai wow dam noh u krehlang wa ka NDA.

Chwa yeini ka sorkar Meghalaya Democratic Alliance (MDA) da rai ko wow pyrchah bait ya ka Citizenship Amendment Bill, wei neiliang u Conrad da ong u wa daw yaklam ha ka sorkar ya ki luti wow leh neini chakhmat.