Yakhih kiwa kreh mylla sngi wow dawa ya ka nongsngi wa biang dor

Shillong: Kiwa kreh mylla hapoh ka lama ka Meghalaya Joint Council of Trade Union & Association (MJCTU&A) ynne ka sngi da yalang ki khrui ha ka thaw pynyieñ kari ka Additional Secretariat, Shillong, wow pynsñiaw ya ki phang dawa kiwa boon.

Kawi na kini ki phang dawa toh wow pynku ya ka nongsngi cha ka T. 18 hajar chi bnai, neibhah kiwa boon duna ware i yoh ki. Da dawa leh wa ka sorkar toh wow e baibaam tymmen T. 6 hajar chi bnai ya kiwa da chong-ngiah, neitæ wow pyndooh ya i e contract ya ki kreh wa pura, wow pait yei ku dor ki mar kiwa ktah ya kiwa mylla sngi.

Kani ka yalang da kyrchaan ko leh ya ka yakhih wa ar sngi ha ka ri waroh kawi wei daw phah dorkhat ki leh cha u montri rangbah ka jylla u Conrad K Sangma hajrong kini ki dawa yong ki, da ong u JL Das uwa man leh u General Secretary ka MJCTU&A.

Ha iwi i liang, u R. Thabah u Asst. Secretary ka AITUC, da ong u wa ka AITUC em ko chiboon i eh ha kani ka jylla nadooh ki Asha, Muster Roll, Aganwadi, kiwa mylla wa kiwi kiwi.

Related posts

Hiar lai pait u Wailadmiki ya ki sarok wa da pynbna wow chna noh hapoh ka Jowai Constituency

May 4, 2025

Phah u Himanta wow tyngkheiñ yei kjat kiwa yaroh ya ka Pakistan

May 2, 2025

U R. Thabah da ong u wa kiwa kreh kiwa man dkhot lang ha kani ka AITUC kynthup ki ya ki Muster Roll, ki Aganwadi, Asha, wa kiwi kiwi.

Da dawa ki wa ya ka RCW kawa da yalok wa kitu kiwa da kreh palat 10 snem u man ki kiwa kreh pura kawa da soi nadooh u snem 1996 da u montri warim u JM Pariat ympu yoh ki wow pynkrehkaam.

Da ong u wa du ha kani ka jylla Meghalaya em kamwa 18-20 hajar ngut kiwa kreh wa haap ha ka AITUC.