Jowai: Ka Khasi Students’ Union (KSU) hapoh i yahkhmat u Donald V. Thabah (General Secretary) da hiar takit ko yeiwa jia ha Tripura ha ka 8 tarik uni u bnai ryngkat wa kiwa kitkaam ma NESO wa All Assam Students’ Union kiwa kynthup ya u Samuel Jyrwa (Chairman, NESO), u Sinam Prakash (Secretary General, NESO), u Dr. Samujjal Bhattacharya (Advisor, NESO) wa u Pritam Hazarika (Central Member, AASU) ynnin wa ynne ka sngi.
Ha i step ka 10 tarik kawa man ka North East Bandh wa khut pynman da ka NESO da em i yalang ki dkhot ka Tripura Students’ Federation ha u sarokbah yong ka Madhab Bari, Jirinia Sub-Division, West Tripura kam chi bynta wow pyrchah ya ka Citizenship (Amendment) Bill 2016 hapyrdi i sonteri ki pulit ka Tripura State Rifles.
Syndet syndet ki paidbah na ka jaitbru Bengali kiwa rah ya ki lama rong stem da mih ki deiwa kbai wei klam beiñ ya ki dkhot ka TSF wa ki jaitbru ri-loom. Heitæ ki pulit ka Tripura da kyntu ki ya ki dkhot ka TSF wa ki jaitbru khian paaid wow yut noh na kani ka thaw yeiwa da kyntait ki paidbah wow mih kat wympu mih ki chwa ki jaitbru ki wymtoh ki jaitbru ri-loom.
Ini da pynchrai i ya ki pulit kiwa da siat da ki bomb pynjhia khmat iwa da pynbor ya ki jaitbru ri-loom wow ran ki chadien wei kat dang ran ki chadien ki pulit leh dang tia ki chakhmat wei ki paidbah ki wymtoh ki jaitbru ri-loom da bood ki nadien ki pulit chirup wa i pakhot moo iwa da pynchrai ya ki ri-loom kiwa da sdang leh wow pakhot moo pyrchah.
Hapyrdi ini i kynaad ki pulit khlem maham da siat ki cha ki paidbah ri-loom hadooh wa poi u pood wa mynsoo 10 ngut ki ri-loom wei 5 ngut da chah siat kuli ki wei ki pulit da psiah ki chapoh chnong ki ri-loom wei da dat khiar ki ya ki paidbah ri-loom.
Iwa rap phylla toh wa ki pulit da kdong ki wot ya ka Ambulance wa kit ya kiwa mynsoo wei da tympiah ki ya kani ka kari wei da phah uiñ biang ya ka wei du hadien itæ da pynkrehkaam noh da ka Section 144 CrPC.
Na kini ki 5 ngut wa chah siat uwi da pynkit noh cha Kolkatta wow yoh yei sumaar wa paka.
Ynne ka sngi kiwa yahkhmat ki soo seiñ, ka NESO, KSU, TSF wa AASU da thmu ki wow lai cha ka Hospital ha Khumleng, Jirania Sub-Division, West Tripura kawa man ka chnong yong ki ri-loom tangwa da chah pynsangeh noh ki ha ki pulit ka jylla hapoh i yahkhmat u Superintendent of Police ka West Tripura.
Ki pulit da pyntip ki wa da phah da u montri rangbah ka jylla u Biplab Dey wymhoi u chah ya uwon uwon wow psiah cha kitu ki thaaiñ khamtam ya ki bru kiwa na baar hanlada da ong ki soo seiñ wow lai pait ya kiwa chah sumaar.
Hajrong ini ka seiñ da beiñ joor ko ya ka sorkar Tripura kawa leh pyrchah ya ka riti synchaar paidbah yong ka ri India wei da beiñ ko leh yei chah siat ki paidbah Meetei kiwa kynthup ya le ngut ki khynnah puræ wa kawi ka manbei Manipur da ki kuli jri ha ki pulit Manipur ynne ka sngi ha nongbah Imphal.
Hajrong ini i jia ka KSU chirup wa ki seiñbhalang ka thaaiñ mihsngi hapoh ka NESO da rai ki wow pynman da ka Black Flag Day ha waroh ki nongbah ki jylla ka thaaiñ mihsngi mynstep ka 12 tarik kam chibynta wow pyrchah yeiwa jia ha Tripura wa Manipur.
Ini toh katkam wa pyntip u Donald V. Thabah, u General Secretary ka Khasi Students’ Union.
Discussion about this post