Shillong: Ka Synjuk ki Nongsynshar Shnong ka Bri u Hynniewtrep (SNSBH) da pynsñiaw ko hakhmat ka sorkar jylla yei wym yahaap wow pynlai ya ka scheme ka sorkar pyrdi lyngba ka Panchayat Ministry da ki wym toh ki rangbah shnong deiwa chna ya ka Gram Sabha Committee kamwa thmu ka ‘My village my plan’.
Kiwa yahkhmat ka SNSBH da pynsñiaw ki hakhmat u Symbood Montri Rangbah ka jylla, u Prestone Tynsong deiwa ong wa ki kaam pynroi toh u lai ki lyngba ki rangbah shnong.
“Da paan pynche i na ka sorkar neibhah yoo i wa ya kani ka scheme ka sorkar pyrdi angnood ko wow wanrah da ka Panchayati Raj Ministry wei wow pynkrehkaam ya ki ymtoh da ki rangbah shnong, wei lada man kamtæ ki bor ka dorbar shnong daw dooh noh ki wei i ym kwah i wow man kamtæ,” da ong u Chairman ka SNSBH, u Dr. W. Kharshiing hawa yaklam wa kiwa pathai khubor.
Da ong u wa yeini toh u ekti bait ha ki rangbah shnong neibhah lada ekti wow pynlai da kiwi lyngba ka Gram Sabha Committee daw tkoh i kaam.
Neiliang u Secretary ka synjuk, u RL Blah da ong u wa kani ka scheme toh u wan bait ko na ka sorkar pyrdi wei ka synjuk kwah ko wa ya kani ka scheme u pynlai bait da u rangbah shnong.
“Kamwa man katni, ki dorbar chnong ym em bynta ki ha kani ka scheme wei na ini i daw kwah i yei pynche na ka sorkar jylla, ha iwon i rukom u pynkrehkaam ya ka neibhah wa kwah i wow pynkrehkaam ya ka pyn da ka chnong hi,” da ong u Blah.
Kam wow pynkynkynmoo heini ka Khasi Hills Autonomous District Council (KHADC) ha u snem wa dadep da pyrchah ko ya kani ka scheme wa wan na ka Panchayat Ministry neibhah wa wanrah ko yei maa ya i rukom synchaar chnong.
Hajrong i pdiang ya kani ka scheme, neiliang u Blah da ong u wa ka synjuk daw bichaar bniah ko yeini wei daw yaklam bniah ko leh wa ka sorkar hajrong ini.
“U ap chwa i yeiwa ka sorkar u ong ko wei hadien daw chim i ya ka rai wow pdiang namo wow kyntait ya ka,” da ong u Blah.
Discussion about this post