Shillong: U President ka United Democratic Party (UDP), u Dr. Donkupar Roy da ong u wa ka Party ka da dep pynkhreh bha ko neibynta ka Election MDC ka wow man ha u Thohlakhmi 27 tarik uni u snem, ha waroh ar tylli ki ADC, cha Khasi Hills Autonomous District Council (KHADC) wa Jaiñtia Hills Autonomous District Council (JHADC).
Hawa klam u ynne ka sngi, u Dr. Donkupar Roy da kam u wa ka UDP daw yoh ko u yahkhmat ya ka Executive Committee ha waroh ar tylli ki ADC hadien ka Election du samen næ wa kiwi ki lok seiñ saiñ pyrthai.
“I da jan dep i wow pynyeiñ kyrtong awjan waroh ki Constituency MDC, ha Jaiñtia Hills da jan dep lut wow pynyeiñ ha waroh ki Constituency wei i da kyrmen skem i wow yoh u yahkhmat ya ka Executive Committee,” da ong u Dr. Donkupar Roy hawa yaklam wa kiwa thoh khubor wei da pynrap u deiwa ong wa ka Party u pyrchang ko wow booh kyrtong ha waroh 29 tylli ki Constituency yong ki ar tylli ki ADC.
Hawa kylli won kammon wow khang yei phet seiñ ki MDC hadien wa jop ya ka Election, da jubab u deiwa ong wa ki kyrtong wa sai katni toh kiwa biang.
Da ong u leh wa ki paidbah da ngiah ki yei phet seiñ ki MDC hadien wa jop Election iwa pynman leh ya kani ka Election kawa katni kawa lyngam lada wyrchaw wa kiwi ki Election kiwa da dep.
Ha iwi tawon i liang u Dr. Donkupar da ong wa i bor yong ka poisa rap duna i krehkaam ko ha ka Election MDC lada pait waka Election MLA, tangwa i por da kylla i heiwa ki bru wa em poisa daw pynemkaam hi ki da ka poisa.
“Ha i yoo yong nga, ha ka Election MLA ka poisa krehkaam ko, tangwa ha ki por wa da dep da duna chiboon i pynemkaam poisa ha ka Election MDC, ye u man wa ki heh spah ym em pyrkhat ki ya ini boi wa da chimkhia ki ya ka Election MDC,” da ong u.
U Dr. Donkupar da ong u wa i eh ya ki seiñ ri-loom toh wa ym e poisa ki. “Lada ki seiñ ri-loom em poisa ki chi pawa na wa em ki seiñ ri-thor (National Party) ym em wow ye u yakhun wa ki seiñ ri-loom ha ki Election,” da pynrap chooh chooh u heh ka UDP.
Discussion about this post