Jowai: U montri rangbah ka jylla, u Conrad K. Sangma ynne da wai u ya ka Police Reserve wa dang dep chna thymme ha Baghmara, South Garo Hills hei emlang u MLA ka thaaiñ u Samuel M. Sangma, u MLA ka Siju-Rongara u Rakkam A. Sangma, u Chief Secretary ka jylla, u T. Ysering, u DGP u R. Chandranathan, Additional Chief Secretary Rebecca Suchiang wa kiwi kiwi.
“I wai ya kani ka Police Reserve ha Baghmara pynyoo i wa ka sorkar sñiawkhia ko ya ki paidbah ka South Garo Hills wei deiwa em kani ka thaw daw e mynsien ko ya ki pulit hapoh ka district,” da ong u Conrad deiwa e khublei ya u DGP wa ka chnat pulit kawa da ye wow pyndep biangpor ya kani ka kreh.
Hajrong ini i wow pyntikna yei chongsuk, u Conrad da ong u wa ka kaam kieñ suloi mih i nei dooh khih dooh kreh kamtæ ka sorkar u pyntikna ko wow em i chongsuk deiwa wanrah ya ki kaam pynroi wa ha rukom.
Da ong u wa ka South Garo Hills da man ko kawa chah ieh beiñ da ki snem wei wow pyntikna wa em ki kaam pynroi, ka sorkar da booh ko ki luti deiwa pynchong sarin ya ki kaam katkam wa dawa. Da pynrap u deiwa ong wa i chna pynmiat ya u sarok Tura – Baghmara daw yarap ko wow wanrah ya ki kaam pynroi hapoh district.
Da pyntip u wa u sarokbah NH – 62 da pynkylla pyrtuid ya oo kam u NH-217 wa sdang nadooh na Dainadubi hadooh Baghmara deiwa lai lyngba ka Siju wa Gasuapara chadooh Tura wei u kut u hadooh Paikan, wei da booh ya ka poisa wow chna pynmiat ya oo wei yooluti wow pyndep hapoh u 2019.
Da pyntip u leh wa ka sorkar pyrdi lyngba ka Union Cabinet da rai ko wow pynkhlan ya ki District Council ha ka thaaiñ mihsngi heiwa daw yoh yarap poisa noh ki na ka sorkar pyrdi.
Discussion about this post