Jowai: Ha ka yachemlang yong ka Kur Kam kawa da pynman ha ka 19 tarik uni u bnai, ka Seiñkur Kam da pynman ko ya ka lehkmen lehsñiawbha ha ka janmiet heiwa da wan wai ya kani ka yachemlang ka kur da u Suklang Shylla uwa man leh kam u MDC Ka 9- Nongjngi.
Ha chwa wow sdang ya ka lehkmen lehsñiawbha, ka Seiñkur Kam da pynkup burom ko ya ki khon ka kur kiwa da leh bha ha ki exam waphær waphær kiwa da poi cha ki kyrdan kiwa cha khmat.
Ya ka pynkup burom da pynlai da u Vice President ka Seiñkur Kam u Proson Kam wei ya ki khusnam da saam da u Suklang Shylla u wa man kam u kongsan ha kani ka janmiet.
Kiwa chah pynkup burom man ki kamni ha wah:
- U Genesis E Kam u wa da pyndep ya ka Post Graduate in Diploma Computer Application na ka RIIT College Don Bosco Square Shillong, wei da poi u ha ka kyrdan First Division deiwa yoh u 70.2 %.
- U Wandame Kam uwa da pyndep ya ka M.Sc, Physics na ka North Eastern Hills University, Shillong wei da poi u ha ka kyrdan “Top 5”.
- Ka Yolarika Kam kawa da pyndep ya ka Bachelor of Science Nursing na ka Woodland Institute of Nursing , Shillong wei da poi ko ha ka kyrdan First Division deiwa yoh ko 65.58%.
- Ka Eva Kam kawa da pyndep ya ka Secondary School Leaving Certificate na ka Cherra Presbyterian Secondary School, Sohra wei da poi ko ha ka kyrdan First Division deiwa yoh 62.33%.
Hadien wa da dep saam ya ki khusnam, u Suklang Shylla da ong u wa katwon wa yoosuk u pait wa hanlada man ka kur kawa khian leh, da yoh ko ya ki khon ka kur kiwa da ye u pyndep ya ki kyrdan waphær waphær kiwa ka pyrthai wa stat katni da emkaam lang ya waroh.
Da pynkut ya ka yalang da u Adviser yong ka Seiñkur Kam u Johnson Kam deiwa e khublei ya waroh khamtam ya kiwa yoh ya ki khusnam heijooh i por deiwa sneiñ wa kyntu ya ki yow yaleh chooh chooh ki u nang minot ha ki kaam yong ki khnang yow nang yoh chooh ki u wanrah burom yong ka kur neini cha khmat.
Discussion about this post