Shillong: Ki seiñ saiñ pyrthai ka thaaiñ mihsngi ka ri India da rai ki wow phah da ka dhab wow yachem ya u Montri Rangbahdooh ka ri India, u Narendra Modi wa u President ka Ri India, u Ramnath Kovind ha ki sngi wow wan wow pynsñiaw yei pyrchah ya ka Citizenship Amendment Bill 2016, ya kawa da mynjur da ka yung Dorbar chna-aiñ Lok Sabha hapoh i yahkhmat ka National Democratic Alliance (NDA) wa yahkhmat da ka BJP.
Ya kani ka rai da chim ynne ha ka yalang ki seiñ saiñ pyrthai ka thaaiñ wa da pynman ha Guwahati wei ya kani ka yalang da khut pynman da u montri rangbah ka jylla, u Conrad K Sangma uwa man leh u National President ka National People’s Party (NPP) heiwa da emlang ki 11 tylli ki seiñ saiñ pyrthai ka thaaiñ wa kynthup ya ki MLA samen.
Kini ki seiñ kynthup ki ya ka AGP, NPP, NDPP, UDP, JDU, IPFT, MNF, NPF, KHNAM, PDF wa HSPDP.
Hadien ka yalang ka North East Political Parties Convention on Citizenship Amendment Bill, 2016, u Conrad da ong u wa ki seiñ da chim ki ya ka ka rai yonglang wow pyrchah ya ka CAB hadooh wa kut wei lada ka sorkar India lai ko chakhmat wow pynman aiñ ya ka kini ki seiñ daw chong prkhat biang ki hajrong kani ka kaam.
U Conrad da pynsñiaw u leh yei sñiawngooh ya ki seiñ kiwa da em ha kani ka yalang heiwa ha ka yalang da chim leh ya ka rai wow chna ya ka Committee wow yasyllok wa waroh ki seiñ ka ri wow pyrchah yei thmu pynman aiñ ya kani ka Bill.
Hajrong i em kiwa boon ki seiñ hapoh ka North East Democratic Alliance (NEDA) wa yahkhmat ka BJP neiliang u Conrad da pyntip u wa ki seiñ daw yachem biang ki sa chisien lada u ran dien namo u pteiñ ki wow em ha ka NEDA, da pynrap u leh deiwa ong wa kani ymtoh ka rynsaan wow yaklam ya kani ka phang.
Ha kani ka yalang da embynta ki seiñ ka thaaiñ kawa da khut da u Conrad katwa ki MLA ka BJP na Meghalaya ym em poi ki cha kani ka yalang hanlada em ki wa ka sorkar MDA wow pyrchah ya kani ka Bill.
Discussion about this post