Jowai: Ka Jaintia Public Works Department Muster Roll Workers & Labour Union, kam chi bynta yow ya jan yow suk i ya krehkaam hapyrdi ki Muster Roll wa kiwi tawan kiwa kreh mylla sngi wa kiwa kreh ha ki chnat sorkar ha jar ki C&RD Block wa ki Sub-division ha waroh ka Ri-loom Jaiñtia da pynkha ya ka chnat yong ka ha Amlarem Sub-Division.
Ka seiñ da khut ko ya ka dorbar paidbah ki Muster Roll kiwa kreh ha ki chnat sorkar kiwa em ha u pood u ang ka Amlarem Sub Division, West Jaintia Hills District, ha ka 18 tarik uni bnai heipor 10:30 i step ha Enowell Hall, Amlarem, heiwa ha kani ka sngi da seiñ leh ya ka chnat krehkam ka seiñ hapoh ka Amlarem Sub-Division.
Ya ka Dorbar da pyllai da u Medi Mukhim, wei da yoh ya i klam na u K.L.Pariat u President ka seiñ uwa da batai ya i krehkam ka seiñ ha ki bnai wa da dep kat hadooh iwa da monjur ka sorkar hapoh i yahkhmat u Conrad K Sangma u Chief Minister wa u P. Tyngsong Deputy CM yow pynku ya ka bai nongsngi kawa T. 196 chisngi kawa u su ka sorkar nadooh ka 01-07-2018 hadooh ka 30-09-18, neitæ ya iwa u pynku bai nongsngi ki Muster Roll na ka T. 196 chisngi cha ka T. 300 chisngi kawa u kreh kaam nadooh ka 01-10-18, kamjooh ya i monjur wow pynku ya u snem wow chong ngiah ki Muster Roll na ka 58 snem cha ka 60 snem, nalor kitai dang em chooh chooh sa kiwi kiwi tawan iwa da dawa ka seiñ, kiwa da monjur ka sorkar jylla.
Na i liang u K.L. Pariat, President ka seiñ, da maham joor u ya waroh kiwa kreh Muster Roll kiwa yoh bai nongsngi na ka sorkar ha waroh ki chnat sorkar ha ri-loom Jaintia, wa ym hoi u yalap Election næ wow mih chongchit ki ha kani ka Election MDC wa ha kiwon kiwon ki Election kiwa daw wan neini, watoh kani ka rukom leh daw ktah joor ko ya i kreh Muster Roll i yong ki.
Ha kani ka dorbar da yoh ya i klam na ka D. Ïakai ka Vice President ka seiñ, kawa da batai chaphang ka Arrear kawa toh u yoh kiwa kreh Muster Roll nadooh ka T. 184, T. 189, T.196 wa ka T. 300 neibynta ki Unskilled wa kiwi tawan ki kyrdan rukom su ka chnat labour.
Da yoh leh ya i klam ebor e mynsieñ na ka Mary Shangpung Treasurer ka seiñ na ka chnat Thadlaskein, kawa da khana ya i pynyoh kreh biang ka seiñ ya kiwa kreh Muster Roll kiwa da pyndam du neidaw wa yoh khonboo.
Ha kani ka Dorbar, da yoh ya i klam wa kyrpang na u L. Nartiang Branch Manager ka Meghalaya Apex Co- op Bank Ltd, Amlarem, uwa da batai ya i yarap ka Bank ya ki paidbah ha kiwa boon ki liang.
Neiliang ka seiñ da pynthymme biang ko ya kiwa krehkaam ka seiñ ha ka chnat Amlarem Sub-Division iwa da pynskem da kyrkhu khyrdoh ya waroh kiwa krehkaam da u K. L. Pariat, kawa da tipmit kam ka Jaintia Public Workers Department Muster Roll Workers & Labour Union, chnat Amlarem Sub Division.
Kiwa kitkaam ka JPWDMW&LU, chnat Amlarem man ki kamni ha wah:
(i) President – U Valiant Sing Pohkyrnu.
(ii) Vice President – U Medinand Mukhim
(iii) Genl Secretary – U Manywell Tongper.
(iv) Asstt Genl Secy – U Owanli Tariang
(v) Treasurer – Ka Pynskhem Nongpluh.
Executive Committee Members:
(1) U A. Mulad (2) Ka T. Pohkyrnu, (3) Ka F. Khyriem (4) U S. Syad (5) U F. Kharwanlang (6) Ka M. Nongrum (7) A. Mukhim (8) u T. Pohling (9) U P. Pohshna (10) U C. Suchiang.
Discussion about this post