Shillong: Ka liang pyrchah ha ka yung dorbar chna aiñ ka jylla, ka Congress ynne da yait ko (boycott) ya u lat ka jylla, u Tathagata Roy heipor wa e klam u ha ka sngi nyngkong yong ka dorbar mang poisa (Budget Session), yong ka sorkar kam ka dak wow pyrchah ya i klam u hajrong i jia ha Pulwama ha ka 14 Thohlakhmi heiwa da chah tynyap 40 ngut ki CRPF. Ka liang pyrchah da dam ko leh wow embynta ha i chondur wa u lat kamwa da jooh leh khlieh snem.
Hawa kylli na u lat hajrong ini i dam ka liang pyrchah wow wan ynne ka sngi, neiliang yong oo da ong u “Da yoo O yeini wei iyi u leh O hajron ini?” wei lada em iwon iwon iwa kwah u wow ong hajrong ini, neiliang u Lat da ong u wa ym kwah de u wow klam iwon iwon hajrong iwa da thoh u ha Twitter u.
Kam wow pynkynmoo heini, ha ka 19 Thohlakhmi, u lat ka jylla da thoh u ha u Twitter wow dam u lai cha Kashmir, wow dam u lai Amarnath ha ki ar snem wow wan. Da thoh u leh wow dam u thied ya ki tiar Kashmir wa kiwi kiwi kiwa man pyrchah ya ki bru na ka jylla Jammu & Kashmir.
Uwa yahkhmat ka liang pyrchah, u Dr. Mukul Sangma hawa yaklam wa kiwa pathai khubor da ong u wa ka ri yaleh ko pyrchah ya ki seiñ kieñ suloi, ym pyrchah ya kiwon kiwon ki jaitbru hapoh ka ri.
Chooh chooh u Mukul da ong u leh wa u montri rangbahdooh ka ri, u Narendra Modi toh u pyndam noh u ya u Tathagatha kam u lat neibynta i bha i miat ka ri hi waroh kawi.
Neiliang u montri rangbah ka jylla, u Conrad Sangma da ong u wa man i i wym miat ya ka liang pyrchah wow dam wow wan ap yei klam u lat ynne ka sngi wei i klam yong oo toh hei bor samen ymtoh kam u lat.
Da pynrap u leh deiwa ong wa i klam u lat toh lyngba ka Twitter Account yong u Tathagata Roy ymtoh na ka yong u lat.
Discussion about this post