Shillong: U kyrtong hunlang ka sorkar synrop yong ka MDA, uwa yakhun ya ka Election MP cha ka Lok Sabha na Shillong na ka chap yong ka UDP, u Dr. Jemino Mawthoh da ong u wa da tikna wa ka Congress ym ye ko wow chna sorkar ha Delhi.
“Katkam ka Survey wa da leh hadooh katni, ong ki wa ka Congress da lei lei ym ye ko wow chna sorkar Delhi, neiyi i daw wa hap bood ya ka Congress,” da ong u Dr. Jemino hawa klam ha ka yalang paidbah ha Madan Polo, Shillong.
Ka MDA ynne ka sngi ka da pynman ko ya ka yalap Election ha nongbah Shillong neibynta u kyrtong hunlang, heiwa da emlang leh ki President yong waroh soo tylli ki Party wa em ha ka sorkar, kitæ ka NPP, UDP, HSPDP wa PDF, kynthup leh ya u MLA samen, ki montri wa em ha ka sorkar MDA wa ki paidbah kiwa da wan na kylleiñ ki bynta ka ri Khasi wa Jaiñtia.
U Dr. Jemino da ong u wa ka Congress katni em ko du 44 ngut ki MP ha Lok Sabha na waroh kawi ka ri India wei la man katwa man leh ym ye ko wow chna sorkar. Da ong u wa ymtip kiyi wow yei u chan sorkar ha Delhi, yei wow wan da ka Third Front næ ye leh wow wan da ki Regional Party wow chna ya ka sorkar ha Delhi.
“Ka Congress ka em ko du 44 ngut ki MP na ki 543 ngut ha kini ki san snem wa da dep, kawa yahap katkam wa chit ka Delhi kawa man 44 Degree Celsius, wei ym ye hi ko leh wow chna sorkar hadien ka Election. Ha ka jylla yong i leh ka Congress ym ye ko wow synchaar, tangwa da synchaar ka MDA,” da ong u.
U General Secretary ka UDP da ong u wa i kam ka Congress wa ka yakhun toh du waka UDP ha kane ka Election toh kawa bakla. Neibhah i yakhun toh pyrchah waka MDA kawa ka chap yong u kyrtong toh haka Bom.
Da pynbaad u leh wa ka Congress toh kawa ber bih ya ki paidbah wow pynsñiawthooh bakla. “I ym e laad i ya ini i thmu ka Congress wow ber bih,” da ong won u kyrtong ka MDA.
Discussion about this post