15 49.0138 8.38624 1 0 4000 1 https://wyrta.com 300 0
Advertisement ad1
Advertisement ad1

Ka sorkar Congress toh ka sorkar JCB ka wym ap yeiwa emkaam ki paidbah: Conrad

0 Comments
Advertisement ad1

Shillong: U National President ka National People’s Party (NPP) uwa man leh u montri rangbah ka jylla Meghalaya, u Conrad Kongal Sangma da ong u wa ka sorkar Congress kawa da lai kawa yahkhmat da u Dr. Mukul Sangma toh ka sorkar kawa khur du ya samen wei rai naphang khlem ap khlem sñiaw ya ki paidbah, thij kam ka kari pooh chiloom (JCB).

“U (L) PA Sangma da kylli u na uwi u MLA wa emlang ha ka sorkar Congress ha kitu ki por, kammon ka sorkar krehkaam ko, neiliang uni u MLA da ong u wa ka sorkar u Mukul toh ka sorkar JCB kawa ym em wa nood wow ong iyi iyi leh,” da ong u Conrad hawa klam ha ka yalang yalang Election ya u kyrtong MP ka MDA ha Shillong.

Da ong u wa ka sorkar MDA ym man ko kam ka sorkar Congress, tangwa man ko kam ka Truck Dumper neidaw wa theh lut ko cha ki paidbah deiwa ap wa sñiaw ya ki paidbah.

“Uwi u MLA ka NPP hawa pynrap chooh da ong u wa ka sorkar Congress toh ka sorkar JCB, katwa ka sorkar MDA toh ka sorkar Dumper kawa theh neibynta ki paidbah. I chim lang lang i ya kawon kawon ka rai,” ong u Conrad deiwa pynrap wa kani man ko kawi na ki nongmuna wow sai du uwi u kyrtong ha kani ka Election.

Ha iwi tawon i liang u President ka NPP da pyntip u wa da mih i phang kylli wa neiyi i daw wa ka NPP ym em sai kyrtong ko na Shillong Seat. “U Dr. Jemino toh u kyrtong ka sorkar MDA wei man u leh u kyrtong yong u CM ya uwa da pynmih ha ka chap yong ka Bom na ka UDP.”

U Conrad da ong u leh ki seiñ saiñ pyrthai na Delhi ym sñiawthooh ki yei eh i khoo ki paidbah yong kani ka thaaiñ ka ri wei ym ye ki leh u chim ya ka rai neibynta ki paidbah.

“Kani ka yalang u phah ko ya ka khubor kawa che cha waroh kawi ka ri India. Hanlada em i sñiaw yaphær heini heitai, tangwa ym ye u mylliñ wa kreh i neibynta ya ki bru yong i. Kani ka khubor katni u phah cha waroh kawi ka ri,” da ong u Conrad.

U Conrad Sangma da kyntu u ya ki paidbah kiwa wan na ki Party wa emlang ha ka sorkar wow mylliñ noh iwa da dep deiwa wan chakhmat wow krehlang yow pynjop emburom ya u kyrtong ka MDA, u Dr. Jemino Mawthoh.

“I u booh i charood yei ya sñiaw yapher Party, wei man ko ka kamram yong ka NPP wa kiwa kyrchaan wow pyntikna wa u Dr. Jemino u jop emburom u ha kani ka Election.” ong u Conrad. 

Advertisement ad1

0 Comments

Leave a Reply