Jowai: Ka KSU ynne ka sngi hapoh i yahkhmat yong u Bonsen Snaitang, President KSU Balat Border Unit deilang wa ki dkhot yong ka KSU Ranikor Circle da lai hiar ki cha ka yaw Balat wow khynra Trading License ya waroh ki dukan ki baar jylla neidaw wa artatien yei rukom khayi pateiñ ki.
Ka seiñ ha kani ka sngi da yoh ko wow khang khyrdep hadooh 8 tylli ki dukan ki wym biang yaka Trading License wei da chem leh wa ha ki ar tylli ki dukan kiwa chong dai ym em ki ya ki kot ki sla wow pynsakhiat ki toh kiyi wei da kam ki toh wa na Bihar wa West Bengal.
Ka seiñ da chem ko leh yei lai lait ki baar jylla yaki kyndon yong ka United Khasi-Jaintia Hills District (Trading by Non Tribals) Rules, 1959 kawa man ka aiñ yong ka District Council heiyatoh waka Trading License kiwa boon ha kani ka thaw toh kiwa da kut nadooh u snem 2015, 2017 wei em leh kiwa nadooh u snem 2012. Kamtæ ka seiñ da ong ko wa kini ki baar jylla chim kabu wei tyngkheiñ ki leh ya ka aiñ ka District Council.
Ka seiñ da ong ko wa ini toh i sdang donhi wei u pyntikna wa ym em wow wan khayi pateiñ khlem biang ki kot ki sla haka thaaiñ khappood ka South West Khasi Hills District wa kiwi kiwi ki thaw wa hap hapoh ka Mawsynram Block. Ka seiñ leh daw lai yachem ko wa u Paul Lyngdoh, EM In-charge Trade yong ka KHADC wow rah yaka kani ka phang khayi pateiñ hapoh ka thaaiñ wa ka District.
Ka seiñ da kyntu ko leh ya ka EC wa thymme ka KHADC wow pyntikna wa kiwa yoh Trading License wow ye ki u dai du ya ki mar wa da yoh bor ki wow dai neibhah boonsien hadien wa yoh License ki da khayi ki hadooh ki mar khloo kawa tyngkheiñ ya ki kyndon ka District Council.
Ini toh katkam wa pyntip u Forwardman Nongrem, President KSU South West Khasi Hills District.
Discussion about this post