Pynbaad ka UDP wa sdang klam kulmar ka Congress wa tieñ ya ki seiñ ri-loom

Shillong: Ka United Democratic Party (UDP) da pynbaad ko wa ka Congress da sdang ko wow klam kulmar haka yalap Election neidaw wa da tieñ ki wa ki seiñ ri-loom da ye ki wow sai kyrtong hunlang ha kani ka Election MP cha Lok Sabha na Shillong.

Hawa yaklam haka yalang ha Sohra, u President ka UDP, u Dr. Donkupar Roy da ong u wa la bood dien ya i klam ki kyrtong ha kini ki sngi wa da dep, “Nga chem O wa u Vincent H Pala katwa dang jan ka sngi thap Vote da sdang kulmar i rukom klam u, u Vincent da tare tyrma u ya ka kaam montri rangbah ka jylla hawa klam u ha Pynursla, wa toh u heh BJP na Guwahati wa u President ka UDP kiwa khang laad ya u Prestone Tynsong wow man montri rangbah, da sñiaw la kamwa u Vincent leh embynta u ha ka tai ka yaklam wei da sakhi u leh ya kani ka yaklam,” da ong u.

Da ong u wa ini pynyoo wa u Vincent Pala da kulmar pyrkhat u ha kani ka Election neidaw wa da tieñ u ya i yatylli ki seiñ ri-loom.

U Dr. Donkupar da ong u wa boon boon snem da yaklam yei emkaam wow yatylli ki seiñ ri-loom kamjooh ki paidbah tangwa da sepai noh ko neidaw wym sñiawthooh yumut lang hadooh wa ki paidbah ym tip de ki yei yi u ap u sñiaw.

Related posts

Pynkhreh ka BJP Meghalaya ya ka Election 2028 deiwa pynskem ya kiwa kitkaam thymme

June 14, 2025

Kyntait ka Agatha Sangma wow man ka kyrtong MP cha Rajya Sabha

May 29, 2025

Da ong u wa ka Citizenship Amendment da pynman ki ya ki seiñ ri-loom wow tyllilang ki.

“Ya ka CAB da pynkylla nadooh u snem 1987 wa 2003, tangwa ym em wa pyrchah kamwa man katni, hadien wa da mih biang ko ha u snem 2016 neidaw wa thmu wow khut ya ki bru wa ngait niam laitnoh ya ki Muslim. Ka Congress ka pyrchah ko toh neidaw wym kynthup lang ya ki Muslim, katwa ki seiñ ri-loom ym emkaam ki ya ki Muslim næ Hindu næ Khristan kiwa na baar ri tangwa da pyrchah ki ya ka CAB wow yada ya ka ri na i wan buhai ki heh paaid wei lada ki paidbah ki kwah wow yada yaka ka jaitbru emkaam wow kyrchaan ya ki seiñ ri-loom ym ya ki seiñ ri-thor lada em daka Congress namo da ka BJP kiwa synchaar,” da ong u Dr. Donkupar.

Neiliang u kyrtong MP, u Dr. Jemino Mawthoh da ong u wa ka Congress da klam kulmar ko khlem yurim deiwa kam wa ya ka sarok Two Lane da pynyoh da ka Congress wei kamjooh ka thaw sumaar wa pawnam wa heh, ka NEIGRIHMS da wanrah dei man MP u Pala.

“Ka surok Two Lane toh kawa da nadooh 20 snem nachwa, ka NEIGRIHMS ym toh wa wanrah da u Pala, tangwa ki MLA Congress ki da kulmar pyrkhat ki neidaw wa ym em bor ki wei da sdang ki wow pynbaad kulmar,” da ong u.

Chooh chooh da ong u wa ka Congress da pynbaad ko wa joor kiwa dih drugs toh i leh ka sorkar MDA wei ini leh da klam kulmar, “Da sñiaw la kam ka sorkar MDA ka dai drugs ko,” da ong u deiwa pynrap wa kini ki pynbaad ka Congress da mih ki neidaw wa ka Congress da syier ki yei yatylli ki seiñ ri-loom ha kani ka Election.