Jowai: Kam chibynta wow wanrah i sñiaw yajan hapyrdi ki paidbah wa ki bru yong ka aiñ kamjooh leh wow wanrah i chongsuk i sñiaw chngaiñ haka imlang sahlang, ka District Legal Service Authority chirup i krehlang waka chnat pulit ka West Jaiñtia Hills District, da pynman ki yaka yalehke kynjat bol wa e pyrtuid “Friendship through Football” ha madan bol ka chnong Ummulong ha kani ka 13 tarik uni u bnai.
U D.S. Marbaniang Secretary ka District Legal Service, hawa e i ktien yahkhmat da ong u, i pynman ya kam kani ka yalehke kynjat bol cha ki thaw wa rap jngai na Jowai toh hajrong i angnood wow wanrah i yajan waki paidbah neibhah teiñ teiñ em ki bru wa pyrkhat bakla wei tieñ ki ya ki bru yong ka aiñ khamtam cha ki thaiñ nongkyndong.
“Kamwa haka yalehke bol hi wym chong du samen wow pynjop yaka liang tangwa dei yakreh chitom lang yong waroh 11 ngut kiwa yalehke, i jooh hi haka imlang sahlang ki chnong ki thaw nadooh na yung kamjooh emkaam ka yakrehlang neibynta wow wanrah i yatylli wei jop,” ong u Marbaniang.
Neilang u SP ka West Jaiñtia Hills District u Lakador Syiem ong u, ya kam kani ka laad ka kabu da chim dei thmu wa neini chakhmat kani ka yalehke u pteiñ ko cha kiwi won ki thaw ka thaiñ dei yakrehlang ki paidbah haki chnong waphær waphær deilang waka chnat pulit deilang waka District Legal Service Authority neibynta u wanrah ya ka suk ka chngaiñ.
Katwa neiliang u kongsan u Dr. H. Lakiang da pynche u waka chnat pulit toh kawa emkaam tam haka ri waroh kawi, neibhah khlem ki ym ye u leh iyi iyi, tangwa i ki paidbah toh u sñiawthooh ki yei kamram wei kitkhlieh yong ki neibynta i yap i im ka imlang sahlang.
Heijooh i por kyntu u wow rah ya kani ka khubor cha kiwi won ki chnong hajrong i thmu yong kani ka yalehke kamjooh leh i kamram ki pulit wei kamram ki paidbah khnang wa i suk i saiñ u wan i haki chnong waka ri hi waroh kawi.
Hawa khyruiñ cha ka yalehke hapyrdi ka chnat pulit pyrchah ka Ummulong Club da man kawa yoosuk wei yathaiñ bha, heiwa hadooh wa kut i por ka yalehke da kut ko mar ar kool.
Kamtæ yow yoh yei rai jop rai rem da pynman da ka yachut Tie-breaker heiwa ka Ummulong Club da yoh rah ko yei naam jop deiwa pynrem 3-2 kool yaka chnat pulit.
Discussion about this post