Jowai: Ka Annual Sport Meet wa ar sngi yong ka skur Govt. Girls Higher Secondary School Jowai, wa jooh pynman khlieh u snem da sdang ko ynne ka sngi ha madan Jrisaleiñ, Chutwakhu heiwa da wan wow wai yaka daka R.S. Mannar Additional Deputy Commissioner, West Jaiñtia Hills District, heiwa da pynhær ko leh yaka lama yong ka skur.
Ka Principal yong ka skur Govt. Girls HSS, ka S. Bareh hawa e yei ktien pdiang da ong ko, ka yalehke Sport hi man ko chibynta yong i puræ puthi yow yoh ki khynnah yei tip i stad ha waroh ki liang. Kamtæ kyntu ko yaki khynnah skur wow chimkhia ki hei kaam Sport neibhah toh kawa emkaam u em chirup deilang i puræ puthi.
Neiliang ka kongsan ka R.S. Mannar ong ko, kamwa ka School Sport man ko chibynta yong i puræ puthi, man ko leh ka wow pynsah kynmo ya ki sngi kam ki khynnah skur, neibhah hei im khynnah skur yoh chiboon i sneiñ i kyntu ha kiwa boon ki liang lyngba kiwa sikai.
Da ong haroh ko ka Sport man ko chibynta wow pynmiat pynbha næ pynwandur yei im u bru, kamtæ kyntu ko yaki khynnah wow chim yaka kam katæ ka bynta kawa ye u yah hei luti wa bha yaka mynried mynkawi yong ki.
Ha kani ka sngi sdang da yoh yaka March Past, yaleh Drill wada chim bynta da ki 4 tylli ki dhab yong kani ka skur wa kynthup ka Rose Group, Lily Group, Pansy Group waka Petunia Group.
Neitæ da em haroh ka yakob phet kam hei jngai wa 100m, 200m, 400m, 800m nalor ka phet Relay, ka Discuss Throw, ka High Jump, Long Jump, Javelin Throw, Shot Put wa kiwi kiwi heiwa ya kiwa chimbynta da bhah katkam i rta.
Discussion about this post