Jowai : Ki chipai BSF kiwa yada ya u pood u saam ka ri India ha ki thaiñ khappood India-Bangladesh ha kani ka sngi 11 tarik da yah ko ya kamwa 30 ngut ki rangbah wow lai paitke ya ka thaiñ Balat khamtam ya ka Border Hat kawa em ha kani ka thaw.
Kitai ki 30 ngut kynthup ki ya u Dolloi Satpator, Dolloi Darang, u Sordar ka Raij Lyngkhat wa kiwi kiwi kiwa kynthup ya ki Waheh Chnong wa ki Secretary chnong na ki thaiñ khappood India wa ka Bangladesh kiwa chong wa sah ha East wa West Jaiñtia Hills.
Hei yaklam wa u DIG ka BSF u SK Singh da ong u wa i thmu yong ka BSF toh hadien wa wan chimkti u IG wa thymme yong ka ha Nangbah Shillong, kwah u wa ki bru ka thaiñ khappood yow yatipmit ki weiwow man ki kiwa yatylli wei kamjooh leh yow pynsñiawthooh yei rukom kreh ka Border Haat.
“I thmu yong i toh wow elaad ya ki paidbah yow yaklam wei wow yaphyllu yumut ki para ki kiwa sah ha ki thaiñ khappood wei wow sñiawthooh yei eh i khoo wa yatyngkhooh ki”,
Da ong utai u heh ka BSF.
Ki paidbah na waroh arliang da ujor ki leh pyrchah ki chipai BSF wa ki chipai ka Bangladesh yei wym yohlaad ki u wanrah ya ki mar yongki deiwa suk cha kani ka yaw Border Haat.
Heiyatoh weini neiliang u DIG ka BSF da pynche u deiwa ong wa ym embor ki wow khang yaki mar wow wan khayi ki bru cha kani ka yaw tangwa hap bood yaki kyndon wada booh da ka sorkar Bangladesh wei ha kani ka yaw ye u wanrah ya ki mar wada mynjur da ki ar tylli ki ri.
Discussion about this post