Jowai: Hanlada man ko ka ka sien wa nyngkong wa ka skur North Liberty Higher Secondary School, Jowai yakhun ko ya ka Exam Higher Secondary School Leaving Certificate (Science), wei kamwa man nachwa ka skur da paw bha ko ha ki Result SSLC, ynne ka sngi ka skur da wan ko chakhmat ha ka kyrdan Top-10 lyngba ar ngut ki khynnah yong ka ha ka Result HSSLC (Science Stream) wa da pynbna daka MBOSE.
Kini ki ar ngut kynthup ki ya u Berennice Anerict Tang, wa chong wa sah ha Dongmihsngi Jowai uwa da yoh ha ka kyrdan 3rd Position wa u Kamphereiei Pala wa na chnong Moolamyniang East Jaiñtia Hills District uwa da yoh ha ka kyrdan 8th Position.
U Berennice Anerict Tang toh u khon wa nyngkong na ki 4 ngut chipayu yong ka Arkidala Tang wa u Artify Son Langstang. Nadooh dang khian da puræ u ha kani hi ka skur wei haka SSLC da yoh u kamwa 91%.
U Kamphereiei Pala won toh u khon wa 3 na ki 5 ngut chi payu yong ka Kratis Pala wa u Emle Pachiang, da pyndep u ya ka SSLC na Tluh Secondary School, East Jaiñtia da iwa yoh 90.5%.
Neiliang u Principal ka skur, u Richard Uriah da ong u wa ini i kreh chitom wa i chaniah yong waroh lang nadooh kiwa sikai ki khynnah skur, ki bei ki pa, wa kiwa pait ya ki wei ym ye u jop khlem i chaniah para bru wa ha u Blai.
Da pynrap u wa ye u ong wa ka Batch yong uni u snem man ko kawa pura neibhah boon ki khynnah wa leh bha, hajrong wa boon hi leh em ki jar jiar ka thong wow lai chakhmat. Lyngba kini yooluti wow yoh ya ka imlang sahlang wa em ki bru wa stat Science ha kiwa boon ki liang.
Kamtæ napyrdi ki 30 ngut ki khynnah wa yakhun 29 ngut da yoh 1st Division kynthup 2 ngut kiwa psiah Top 10, katwa samen won da yoh 2nd Division.
Discussion about this post