Jowai: Ka seiñ kiwa chet ja sngi ha ri-loom Jaiñtia namo ka All Jaiñtia Mid Day Meal Workers Union, ynne ka sngi da pynman yalang ko ha Yungwalieh ka Panliar wow pyrkhat hajrong i eh i khoo yong ki ha ki 9 snem wa da lai.
Ha kani ka yalang da pynsñiaw yei eh i khoo wa yachem ha ki skur wei iwa kongsan tam toh ka tulop kawa yoh ki man ko kawa khian bha, katwa ki dor ki mar man ki kiwa dang ku kat dang lai ki por ki sngi.
Da ong ki wa ym em por de ki wow leh da kiwi ki kreh neibhah i por pynkhreh chet sdang i nadooh 8 waje i step wei kat u dep da poi i janmiet wei ini man i nadooh ka sngi nyngkong hadooh ka Thohdieñ.
Tangwa han la kattæ leh da ong ki wa man ki kiwa yaichah neidaw wa yooluti ki wa man ko ka kreh sorkar boi bien ka sorkar u wyrai ki wei ye ko wow pynku heiwon iwon i por.
Kamtæ da chim ki ya ka rai wow lai pynsñiaw yei eh i khoo cha u montri ka sorkar pyrdi wa pait ya ka chnat Ministry of Human Resource wa cha u montri rangbah ka jylla Meghalaya wow yarap pynku ya ka tulop na ka T. 1000 wa e ka sorkar nadooh u snem 2009 cha ka T. 5000 chibnai wei wow su waroh 12 bnai ym du 10 bnai donhi ha ka chi snem.
Neitæ wow yoh tulop wa chuti heipor wa yoh khon neibynta ki manbei wa manpa, i su hawa kjut wa chitom wa khlaad, ka bai baam tymmen hadien wa da dap 60 snem i rta, wow pynthymme ya ki rukom chet dei bor ka sngi (Solar Energy) namo LPG ymtoh de deiwa chet ha tpai da ki dieñ wa kiwi kiwi ki phang dawa.
Ha kani ka jooh ka sngi da pynthymme ya kiwa kitkaam ka seiñ wa kynthup u President Onikson Pariat, Vice President ka Kriti Dkhar, General Secretary ka Nela Toi, Assistant General Secretary ka Lana Laloo, Treasurer ka Rimika Challam wa 25 ngut ki Executive Members.
Kiwa mihkhmat na Shillong leh da emlang ki ha kani ka yalang kiwa kynthup ya ka E. Rynjah, Pyntngenlang Kharmuti, ka Larisa Marbaniang wa soo ngut kiwi.
Discussion about this post