Shillong: Hadien wa da kut noh i jied ya kiwa mihkhmat MP cha ka dorbar Lok Sabha ka ri ynnin ka 19 tarik, heiwa ki laad pathai kiwa boon hapoh ka ri kiwa da chim yukheiñ kiyi wo jop wa kiyi wow rem ha kani ka kynti wei katkam wa da kheiñ boon da ong ki wa ka National Democratic Alliance (NDA) wa yahkhmat da ka BJP daw wan biang ko heibor wow synchaar.
Heiyatoh wa ini i, neiliang u National President ka National People’s Party (NPP) uwa man leh kam u Montri Rangbah ka Meghalaya, u Conrad Kongal Sangma da ong u wa emkaam wow yang yaka 23 tarik uni u bnai yow che kiyi wow yoh synchaar.
“Hawa yatoh waka Election, boonsien iwa kheiñ jooh yahap ko wei ym ye u len tangwa yow pyntikna ya ini hap yang yaka sngi niaw Vote,” da ong u Conrad.
Hawa pynsñiaw ya kani ka rukom kheiñ chwa wa pynyoo waka sorkar NDA wa yahkhat daka BJP dawa yoh biang ko wow synchaar haka ri India, da ong u, “Katkam i yukheiñ da pynyoo wa ka NDA daw wan biang ko ha i bor wei yei u man daw khia cha ka. Lada man sakhiat kamtæ da pynyoo wa ki paidbah ha ka ri ki dang chaniah ki yei yahkhmat u Narendra Modi kam u Montri Rangbahdooh.”
“Nga tharai O wa ka ri India waroh kawi hi da yoo ko yei kaam yong ka sorkar NDA ha kini ki san snem wa da dep, khamtam heiyatoh wa ki kaam pynroi wei ini ye wa da pynhun ya kiwa chong chnong. Tangwa lada kattæ leh u ye u e yaka jubab wa biang wa khaddooh ha ka 23 tarik,” da ong u Conrad.
Hawa yatoh won wa ka Meghalaya kawa em ar tylli ki Parliamentary Constituency, u Conrad da pynsñiaw u yei sñiaw skem wa ki kyrtong ka MDA u yoh ki yei jop.
Discussion about this post