Jowai : Ki dkhot ka EC yong ka Dorbar Dong Tympang Iawmusiang hadein wa da dep chong pyrkhat ki haka yalang wa pynman ynnin i miet hei yatoh wa i lang i jhep ha Iawmusiang da rai ki wow yachem wa u CEM ka JHADC u ma Thombor Chiwat yow tyrwa yarap ya ka Council hadien wa yoo ki wa da sdang ka JHADC u khat yei jhep na Iawmusiang.
Kamtæ da booh yei por yachem wa u CEM heipor 1 waje i sngi ynne ka 19 tarik ha ka ophis yong oo. Ki dkhot ka Iawmusiang hadien wa poi ki ha ophis u CEM 10 minit chwa i por wei da pyndep ki ya waroh wa emkaam yow yachem wa oo da chah pynyang ki hadooh 40 minit cha lait ka ophis yong oo.
Kamtæ dei mynsien sñiawrem da rai ki u liwan deiwa phah paan biang ya ka Appointment Slip heiwa heini ipor u CEM da khut u ya ki chapoh kamra u tangwa neiliang ki dkhot ka dong Iawmusiang da kyntait ki u psiah neidaw wa ong ki wa ki wan ki yei kaam yong chnong tangwa neiliang u CEM ym em chimkhia wei ym kheiñkor u yei por yong ki.
Hadien ini hei yaklam u Chairman ka dong u ma Embhahlang Khyriem wa u General Secretary u ma Ajoy Lywait wa kiwa thoh khubor ha ka ophis yong ka dong, ong ki wa i thmu yong ki ynne ka sngi toh u tyrwa yarap ya ka JHADC hadien wa da yoo ki wa ka JHADC da sdang ko u khat yei jhep ar sien chi tayaw nadooh ka 13 tarik uni u bnai.
Ka Dorbar Dong Tympang ynne ka sngi mut ko u tyrwa yarap katwa ye ko yow ye ka JHADC u khat hadooh 4-5 sngi chi tayaw katwa ym pu sdang biang ka Jowai Municipal Board u kreh. Ini i yarap da ong wa ye i u wan heidur ka poisa kawa ka Dong smat ko u sai na ka Fund yong ka hi wa kiwi kiwi kiwa ka JHADC ye ko u emkaam yow pynboonsien yeini i khat jep yong ka na Iawmusiang tangwa du neidaw wa u CEM ym em chimkhia u yachem wa ki dkhot ka dong waroh ini da man i iwa sepai.
Discussion about this post