Pynbna u Shangpliang yei kyrchaan yaka sorkar hadien wa tipmit ko ya u murit khloo wa u sla-tyrpad kam ki maar rep

Shillong: Uwa e ktien yaka Congress uwa man leh u MLA ka Mawsynram, u Himalaya Muktan Shangpliang da pynsñiaw u yei sñiawkmen hadien wa ka sorkar da pynbna ko wow tipmit nooh ya u murit khloo wa ya ka sla-tyrpad kam ki maar rep ym toh de kam kiwa mih cha khloo.

“Ini man i i jop ya ki warep neibhah i angnood yong ki da man sakhiat i. Ka chnat ka rep ka riang da pynbna wow tipmit noh ya kini kam ki maar rep,” da ong u Shangpliang hawa yaklam wa kiwa thoh khubor ynne ka sngi.

ADVERTISEMENT

U Shangpliang toh u MLA ka liang pyrchah ha ka jylla uwa man uwi uwa klam khlem sangeh ha ka yung dorbar chna aiñ yow kyntu ya ka sorkar wa toh u tipmit noh ya kini ki jait thung deilang wa u saroo.

“Nadooh wa nga jop O kam u MLA nga da rah O ya ki phang wa yatoh wa ki warep ha yung dorbar, nga da dawa O leh na ka sorkar wa toh u pynkylla maar rep ya kini ki jait thung wa mih ha khloo. Nga da pynkynmoo biang O ha ka dorbar mang poisa uni u snem, heiwa da yoh ya i kular na u montri wa pait ya ka kaam rep wei hapoh le bnai ka sorkar daw pyndep noh ko ya iwa emkaam wow tipmit ya kini ki jait thung wa mih ha khloo kam ki maar rep,” da ong u, wei da pynrap deiwa yaroh wei e khublei yaka ka sorkar Meghalaya Democratic Alliance (MDA) kawa da chim ya kani ka rai.

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

Heiyatoh won wa u saroo da ong u wa ka chnat da pyntip ko wa ya ini daw yaklam haka yalang ki montri kawa daw pynman haka 10 tarik u bnai wow wan.

U Shangpliang da ong u wa da ini i tipmit ya kini ki ar tylli ki jait thung u murit khloo wa yaka sla-tyrpad kam ki maar rep, ki warep ym hap de ki wow su dan kamwa jooh leh ki waroh chi kattu.

Da pyntip u leh wa ini i pynkylla yong ka sorkar toh hadien wa da chem wa ya kani ka aiñ toh kawa da rim nadooh u snem 1891, kawa kynthup lang ya u saroo wa ki siej kam ki mar khloo.

Ha i jooh i por u MLA ka Congress da pynsñiaw u leh yei kyrchaan yei thmu ka sorkar wow wanrah ya ka Farmer’s Commission.

“Ka sorkar kawa kreh neibynta ki warep nga kyrchaan O ya ka, hanlada nga chong O haka liang pyrchah lada kani ka sorkar kreh ko neibynta u paidbah paidlang,” ong u Shangpliang.