Jowai: U montri wa pait yaka chnat khloo ka sorkar jylla u Lahkmen Rymbui, hawa e yeiklam haka sngi lehkmen pynneh pynsah rymaw ha chnong Nongtalang ynnin ka 8 tarik, da ong u ka jylla yong i toh kawa embhah wei mahajon lyngba i em ki mrad ki sim wa boonjait, kamjooh ki phlang ki ranem, tangwa katni da sdang doohjait ki, wei hei yatoh weini da pynche u wa neiliang ka sorkar da em i mang kyrpang næ ka Scheme wow pynneh pynsah yaki, kammon u thooh ki laad ki luti, wei da khut u leh ya kiwon kiwon wa emsap nei bynta u ya e yumut wow yachem ki waki sahep yong ka chnat wa toh u pait ki jar jiar ki kaam.
Chooh chooh hei yatoh wa kani ka sngi hajrong ka phang kawa ong “Air Pollution” ong u “I kreh chitom i neibynta wow yoh yeiwon iwon i emkaam yong i, tangwa neibynta wow yoh yaka la-ær won ym hap i u kreh chitom kawa wan hi ko heiwon iwon i thaw wa em i, wei wym ye i wow riñ yaka la-ær wa tngit, kamtæ ha pyrthai waroh sñiawthooh ki yei emkaam ka la-ær”.
Heijooh i por ong u, i ki bru hi toh ki daw wa khroo yei tngit ka la-ær wei hawa da tip i yeini, toh u khyrngiat yong bru wa kammon u sumaar yaka, nalor hawa i leh næ pynemkam i ya iwon iwon toh u bood katkam ki aiñ wym wow leh tam.
Ya kani ka lehkmen pynneh pynsah rymaw da pynman daka chnat Forest and Environment yong ka sorkar jylla lyngba ka yung krehkaam Division Forest Officer, Social Forestry Division Jowai, ha Khla Champa Club yong ka chnong Nongtalang, hei emlang kiwi won ki sahep ka ka chnat khloo kam u R.S. Gill, IFS, Additional Principal Chief Conservation, u S.A. Nongseij, IFS, Chief Conservator, ki sahep waphær waphær, ki khynnah skur wa kiwi.
Neiliang u C.P. Marak IFS, PCCF & HoFF, ong u wa katkam ka Report yong ka WHO, boon Billion ngut ki bru haka pyrthai yap ki toh nei jait kjut wa yoh lyngba i tngit ka la-ær wa riñ mynsien.
Kamtæ i sumaar yaki soodong sookun wym mut du yei myntoi ka rymaw tangwa neibynta yong i hi, kamjooh yaki pateiñ wow wan nalor wym toh u e laad waka jylla wa yoosuk yong i u kylla ri chyiap tangwa u chim i rai kut wow pynman yaka jylla kawa khooid wa yirngam.
U H. Mohrmen Environmentalist, ong u wa i im i katni haka juk yong i kylla ka suiñbneiñ neidaw wa leh u bru hi iwa da pyntngit yaka la-ær nalor wa pyntngit leh ki umbam umdih. Da pynkynmo haroh u wa dang ini wa dep kani ka chnong leh maad ko yei tngit ki umdih neidaw i tih moochuni.
Hei yatoh wa ini da pynrap u deiwa ong, hanla wym ye u pynkylla yaka pyrthai tangwa em won hi i bynta wa ye i u leh, kam i sdang wakhian, da kyrpaad u wa toh u pynduna i pynemkam ware yaki kari, u pyrchang katwa ye wow pynduna i pynemkaam Plastic, wei kamjooh wym hoi u noh taroi yei jhep.
U J.M. Pohsngap IFS, Conservator of Forest (CC,R&T) hadien wa pynsñiawthooh u yei kordor ka rymaw kamjooh ki laad ki luti waka sorkar da leh ko neibynta u pynneh pynsah chirup i krehlang u paidbah, da khut u chei kylla wamut lada i da leh bakla i neibynta ka rymaw.
Kiwi won wa e i klam kynthup u waheh chnong Nongtalang u M. Lyngdoh Talang, ka N. Laloo, MFS, Division Forest Officer, Social Forestry Division Jaiñtia Hills wa kiwi.
Da yoh leh i saam Prize cha kiwa jop hei yakob drawing, essay, extempore speech wada chim bynta daki skur naka chnong Nongtalang, Sohkha waka Lamin.
Hadien ka yalang da em won i thung dieñ ha pchem yong ka College ka chnong Nongtalang wa da chimbynta da kiwa boon wei hadooh kamwa 2000 tre dieñ da thung ha kani ka chnong.
Discussion about this post