June 9, 2019

Kem ki pulit ka WJH ya i ksiar T. 70 lak wa da murieh hapoh khrop

Jowai: Ki pulit ka West Jaiñtia Hills hadien wa yoh yutip ki wa em ki mar kiwa khayi tooh kiwa daw lai luti napoh ka District, ki pulit ka District Executive Force wa yahkhmat da u Donkupar Moksha wa ka Police Special Party wa yahkhmat da u SI A. Wahlang da kynreh kari ki ha Phramer, WJH.

Heipor chi waje i step synyaw ynne ka sngi da pynsangeh ki ya kawi ka Night Super Bus kawa em ya u number AS 01 KC 9461 kawa wan na Jiribam, Manipur wei da wai ya waroh ki muna wa kit kiwa chong hapoh Bus tangwa ym em chem ki ya iyi iyi leh.

Hadien wa da kynreh biang ya uwi u bru wa suba ki da chem wa khia ki khrop (Sandal) u kamwa 1 kilo chiliang wei heitæ da chem wa da murieh ya i ksiar.

Napoh kini ki khrop da chem 12 tylli ki biskit ksiar (Gold Bars) kiwa khia 166gm iwi wei chongdor ki waroh T. 70 Lak.

Ya uni u bru wa khayi ya ini i ksiar da tip kam u Amir Hussain uwa na Lilong Turel Ahanbi, Manipur wei da ku u ha kani ka Bus na Silchar wei thmu wow lai cha Guwahati, Assam.

Chooh chooh da ong wa manda poi ha Guwahati daw em wow wan thooh ya kini ki ksiar na oo.

Ya u Amir da pynngat hapoh ka kyndon Section 135 Customs Act wei daw ekti noh ya oo ha ki Customs wow pynman ya i takit.