Khliehriat: Ki dkhot yong ka Southern Border Youth Welfare Association (SBYWA), da lai pait ki yaka sarok ka chnat PWD, uwa tip kam u Rymbai-Bataw-Borkhat-Jelalpur (RBBJ) Road, uwa da sih wei chong um lut la kamwa le bnai kattu ha ki bynta yong ka chnong Lama wa Borkhat, ki chnong wa em mar khappood waka ri Bangladesh, kiwa jngai kamwa 45 Km naka chnong Rymbai.
Ha ini lai sylli ka seiñ ka dap ko dei sñiaw lyngngoh kawa khroo hadien wa hadooh ki kari heh leh ym man de wow lai lada ym em wa taan næ wa ngiat.
U President wa u General Secretary ka Association kiwa kynthup ya u Skhembor Shadap wa u Namphrangmi Talang, da ong ki wa ini i sih yong uni u sarok da ktah ko ya i lai i wan yong kiwa chong chnong ka thaaiñ, kiwa kynthup yaka chnong Borkhat, Natbor, Pdengwah Khynriam, Kwator, Hingaria wa kiwi, khamtam ha ka bah ka kit wa ha i kjut i chitom.
Hawa yaklam wa kiwa chong chnong ka thaaiñ da ong ki wa u EE PWD dang dep wan pait u ya uni u sarok hadien wa da pyntip cha oo, tangwa hadooh kattæ ym pu em leh iyi iyi leh.
Neiliang ka seiñ da ong ko wa daw yachem smat ko wa u MDC ka thaaiñ u Dr. Sanki Shangpung, kamjooh ya u MLA ka thaaiñ u Shitlang Pale yei chah ktah ki bru kiwa chnong cha kani ka thaaiñ khappood.
Discussion about this post