Jowai : Ynnin ka 23 tarik heipor 3 waje i janmiet da wan ka lyær yong wa joor bha kawa da khyndang ya ki yung kamwa 15 tylli wa em ha Trangblang (Satpator) wa ha Trangblang Mission. Ki tre chnong da khana ki wa ha chwa u wan kani ka lyær dooh ka light kawa wan ynnin hadien chi tayaw wei sdang i pyrthai u doom. Da sñiaw ya i ood kani ka lyær wa joor bha wei du ki kattu katni second donhi da wanrah ko ya ki pynjæt tympra wa joor bha ha ki yung ki sem kamjooh wa ki dieñ.
Neiliang u Wyrta ynne da lai li sakhi u yeini wei da chem wa chwa u poi cha kani ka chnong leh da em u post light wa da haap harood sarok wa kamjooh leh ya ki dieñ wa boon wa chah tdeh na tre.
Ya i yung wa nyngkong wa yoh u yoo toh iwa ym em tnoom de iwa da chah noh chadein yung ha ka lyær wei iwa da chlai um na u slap wa bood hadien wa wan ka lyær. Ha ini i yung embhah wa ym em bru hapoh kani ka yung.
Ha ki luti ka chnong da chem wa boon ki dieñ da kheiñ ki mar chiteiñ wei em kiwa da cha sai na tre kamooh leh ki wire wa ki post light wa kheiñ wa tkut.
Emleh sa kawi ka yung warim wa pynemkaam yow pyllang saroo kawa da chah khloh ka tin kamwa khoh soh khontara.
Iwi won i yung da wiar i plak lait noh sa i yurim yung iwa pynsakhiat wa jooh em yung heini. Hapoh ini i yung heipor wa wan ka lyær da em 9 ngut ki bru wa kynthup ya ki khynnah tangwa heini leh ym em wa mynsoo joor lait noh na ka manbei wa ka diah ko wa takha malu mala cha doh ki neidaw ki tair wa kit ka lyær. Ya ki khynnah waroh da psiah ki chapoh palong yow rieh kawa da chah rah leh cha rood i yung.
Kamni tymbud luti da chem ya kiwa boon ki yung leh ha Trangblang Mission wa chah khyndang ki tin wei da em leh kawi ka yung wa chah kynrong na tre yurim yung cha chrooh wei kamjooh da chah kit ki tin yung.
Neiliang ka chnong da dep chong dorbar ki wei da rai ki u chna da ki yung wa chibet chipor ya kitu kiwa da dooh ya ki yung yong ki. Katwa na ki bor sorkar da wan u BDO wa ki Magistrate yow jied ya kiwa emkaaam yarap jhan yow ye ki u pynpoi smat ya iwa emkaam cha ki.
Em leh ar tylli ki yung wa ong wa chah dat ki ha u laitlieh hadien wa kut ka lyær hadooh wa tkut ki wire light wei da piah wei kaad ki chram.
Kini hawah ki dur yong kiwi ki yung wa da chah syllad ha ka lyær yong.
Discussion about this post