Shillong: Ka Khasi Jaiñtia Butcher’s Welfare Association (KJBWA) da pynbna ko wa daw pteiñ ko u sangeh thied wei wow ah doh masi katwa ka sorkar ympu ye ko wow pynbait ya ki dawa ka seiñ khamtam i challan tooh cha Bangladesh.
Ini i sangeh wow ah doh masi ka KJBWA da neh i palat le tayaw wei ha ka yalang ynne ka sngi, ki dkhot wa wan na kylleiñ ka Khasi Jaiñtia da rai ki wow pteiñ ya ini i yakhih.
Hadien ka yalang u President ka KJBWA, u Generous Warlarpih da pynsñiaw u yei emkaam ya ka yaaw masi wa thymme ka wow em noh ha Byrnihat neibhah kawa em katni ym man ko du neibynta wow khayi masi donhi.
Da ong u wa kani ka yaw thymme ym man de ko ka yong ka Hima Mylliem neibhah katkam wa man katni ka Hima da sait-kti ko yeiyi iwa jia ha Khyndai-mer, Khanapara deiwa ekti wei pynbaad bait ha kiwa chim wai. Da ong u leh deiwa kyrriah ya ka yaaw daw khanglaad ko yei challan masi tooh hadooh 80%.
Ini i yakhih kiwa ah doh masi da jia i leh ha ki por wa dadep wei hadien wa pynbait da sakhi yei pynku dor da kiwa khayi, tangwa hawa kylli won yeini neiliang u Warlarpih da ong u wa i yakhih ka seiñ toh wow dam u elaad wow pynku dor, neibhah wa lada ka seiñ suki hi-eh ko hadooh katni i dor ye i wow poi hadooh T. 500 chi kilo.
U heh ka KJBWA da kular u wa ka seiñ daw pynneh bait ko yei dor i doh masi kamwa jooh man hi, tangwa lada neiliang ka sorkar ymye ko wow khoom u kdoh yeini i challan tooh ym yohsa de ko wow pynku yei dor lada emkaam wow pynlai bait ya ka kaam.
Discussion about this post