Wai u Banteidor ya ka Grassroot Centre wow e sikai yalehbol ya ki khynnah ha Thangsning

Shillong: Ka chnong Thangsning kawa haap hapoh ka Mawkynrew Constituency, da yoh ko ya ka Grassroot Centre neibynta wow e sikai ya ki khynnah chynrang wa kynthai wa hapoh 12 snem i rta wow pynpliah yaka yalehke Football.

Ya kani ka Grassroot Centre da wai ynne ka sngi da u MLA ka thaaiñ uwa man leh u montri wa pait yaka kaam yalehke ka sorkar jylla, u Banteidor Lyngdoh ha ka yalang wa man ha madan katai ka chnong. Ha kani ka sngi da emlang leh u District Sports Officer ka EKH, u Daniel Dunn, ka Chairman yong ka Mawkynrew Cup, ka Amanda Pakyntein, u sordar ka Thangsning, u T. Nongkhlaw wa kiwi ki kiwa yahkhmat yong ka chnong nalor kiwa chong chnong wa ki khynnah.

Ka Mawkynrew da yoh ko 8 tylli kam kini ki Centre wow pynbniah ya ki khynnah ha kani ka yalehke wei ka chnong Thangsning toh kawa nyngkong dooh wow yoh wai wei daw bood won sa 7 tylli kiwi tawon.

Neiliang u DSO da pyntip u wa neiliang ka chnat daw phah ko ar ngut ki Coach ha kawi ka Centre wow e sikai ya ki khynnah ka wow man arsien chitayaw khnang wow ye ki u sai yei sap ha ka kaam yalehke.

Related posts

3rd Division EJHDFA: Jop ka Lumchyrmit wa ka Lama Youth

July 5, 2025

3rd Division EJHDFA: Jop ka Wahsanphaw, Youngstar wa ka Rymbai

July 4, 2025

Hawa klam ha kani ka sngi, neiliang u Banteidor da ong u wa da yoo wa ha kani ka taaiñ wa ki em ki chiboon ki khynroo hadooh ki khynnah kiwa em yaka sap ha ka yalehke Football wei kani ka laad wow chah sikai nadooh wa dang khian u man ko ka laad neibynta yong ki kynnah wow ku ha kani ka yalehke.

Da pynsñiaw u leh yei kmen na ini wa yoh wow wai laad ya ki khynnah ha kani ka thaaiñ wei da pyntip u leh wa kam kini ki e yalehke daw wai leh ha kiwi ki bynta ka jylla neibynta wow kyntu ya ka sap yong ki khynnah.

Ha kawi ka liang u montri da kyntu u leh ya ki khynnah wa toh u man ki kiwa minot wei kiwa kreh chitom khnang yow ye ki u wanrah ka burom ya ka yung ka sem wa ya ka imlang sahlang. Da ong u leh wa ka yalehke Football ym toh du kam ka yalehke kawa pynwyrngia ha kani ka jylla næ ha ka pyrthai waroh kawi, tangwa katni da man ko leh ka laad kamai jakpoh wow pynim ya ki kamjooh yaka yung ka sem, deiwa e nongmuna leh wa ka yalehke kiwa syad dor dooh toh kiwa yalehke Football.

Ha kani ka sngi da yoh leh ya i klam na ka Chairman ka Mawkynrew Cup, ka Amanda kawa da kyntu ya ki khynnah wow man ki kiwa kreh chitom wa minot ha waroh ki sap wa ki em ki deilang waka puræ puthi.

Hadien ka yalang da yoh leh ya ka yalehke paralok hapyrdi ki khynnah kawa da pyn chongchit ya kani ka sngi.