Jowai: Hadien wa da pynmih ya ka khubor ha ka 14 tarik uni u bnai heiyatoh wa i chem chitom ki paidbah wow yaleh ya ki kot wa emkaam kam ki ST Certificate, ki PRC wa kiwi kiwi, neiliang u DC ka West Jaiñtia Hills, u Garod LSN Dykes da kular u wow chimkhia yeini khnang wow pynsuk ya ki paidbah khamtam kiwa emkaam jhan ya kini ki kot.
Neiliang u Garod ha kani ka 28 tarik ha i yachem wa u Wyrta da pyntip u ini i chem chitom ki paidbah man i du i sñiawthooh bakla donhi deiwa ong wa ki bru kiwa pyndap ymtoh u pynemkaam ki da ka jooh ka kot (ID, DOB, Residential) ha ki le tylli ki thaw wa emkaam (Documents required/Name of enclosure) iwa mut ymye wow pynemkaam ya ka EPIC kam ka sabut (proof) ya ka sngikha, ka thaw sah wa ka ID proof.
Heiyatoh wa i pynsabut kot da ka EPIC na kawi tawon ka District kiwa kreh ka chnat wa pait ya kani ka kaam hapoh ka yung krehkaam u Deputy Commissioner da ong ki wa man i iwymye u pdiang wei emkaam bait wow pynsabut da kiwa yoh napoh ka District hi, ini mut i wa lada ka EPIC toh ka yong u pa uwa na East Jaiñtia emkaam won wow e da ka EPIC ka bei kawa da yoh ya ka EPIC na West Jaiñtia.
Kamjooh leh ki kot wow pynsakhiat ya i thaw sah namo ka Proof of Residence lada pynemkaam da ka EPIC ha kiwi ki thaw (requirements) da emkaam won e da kiwi tawon ki kot kam ki kot wa yoh na u waheh chnong, ka Bill Light, Ration Card wa kiwi kiwi.
Ha kawi tawon ka kynti toh kawa paan ya ki kot ki sla toh ka ‘ID’ yong ka bei namo u pa, heiwa kiwa pyndap (kiwa da murieh pyrtuid) da e ki da ka EPIC yong u pa yong ki uwa em EPIC na East Jaiñtia Hills tangwa da chah kyntait deiwa ong ‘kindly upload voter ID fall under the district of west jaintia hills district’.
Sa iwi tawon i pynche toh wow pynsabut ya ka tarik sngikha (Date of Birth) lada dadep pynemkaam ya ka EPIC da emkaam won wow e da kawi tawon ka kot pynsabut kam ka ka Birth Certificate wa yoh na ki PHC, CHC, ki thaw puræ (ha ki kattu katni ki bynta), wa kiwi kiwi.
Chooh chooh sa iwi iwa da pynche kiwa kreh kani ka chnat toh heiyatoh wa ka PRC heiwa kawi na ki bynta kiwa chem chah kyntait bha ki paidbah toh ka bynta kawa paan ya ka “Supporting Document” heiwa da kyntu ya kiwa pyndap khamtam kiwa lai puræ wow pynemkaam ki da ka Receipt wa yoh ki na ka thaw puræ, ki kot wa yoh ki na ki thaw puræ, wa kiwi kiwi.
Heijooh i por kiwa kreh ka chnat da pyntip ki wa ki paidbah ye ki leh wow yaleh ya kini ki kot pyn daki hi khlem lai cha ki Cyber Cafe namo ki CSC wei ye ki leh wow lai ha ki website megedistrict.gov.in wei ya ka yutip namo i pynche hajrong kini ki kot wa emkaam ye ki leh wow lai mih cha ka yung krehkaam u DC ka WJH.
Heiyatoh wa ini i chem chitom ki paidbah neiliang u Wyrta.com da yaleh katwa ye wow pynche hajrong ini i chitom ki paidbah wei, wei lada emkaam ye leh wow pait ya kini ki kot wa emkaam heini hawah:
Also Read: Chitom ki paidbah wa yaleh ST Certificate ha WJH, kular u DC wow chimkhia yeini
Discussion about this post